سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ ازيا جانە تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسيانىڭ اتقارۋشى حاتشىسى ارميدا اليشاحبانا باستاعان بۇۇ دەلەگاسياسىمەن كەزدەستى. تاراپتار سۋ سالاسىن سيفرلاندىرۋ باعىتىنداعى ىنتىماقتاستىق مۇمكىندىكتەرىن تالقىلادى.
نۇرجان نۇرجىگىتوۆ بۇگىندە مينيسترلىك بىرىككەن ۇلتتار ۇيىمىنىڭ دامۋ باعدارلاماسىمەن بىرلەسە سۋ تاسقىنىن بولجاۋ جانە مودەلدەۋ بويىنشا TALSIM (گەرمانيا) جانە Delft-FEWS (نيدەرلاندى) جۇيەلەرىن قازاقستانعا بەيىمدەۋ بويىنشا جۇمىس جۇرگىزىپ جاتقانىن مالىمدەدى. سونداي-اق، بىلىكتى ماماندارمەن سۋ سالاسىنىڭ الەۋەتىن ارتتىرۋ باعىتىندا اتقارىلىپ جاتقان جۇمىستار جايلى ايتتى، دەپ حابارلايدى aqshamnews.kz سالا مينيسترلىگىنە سىلتەمە جاساپ.
«ەلىمىزدەگى 9 جوعارى وقۋ ورنىمەن ىنتىماقتاستىق تۋرالى مەموراندۋمعا قول قويدىق. بيىل «بولاشاق» باعدارلاماسىنا سۋ سالاسىنىڭ ماماندىقتارى قوسىلدى. قازاقستاندىق 2 ۋنيۆەرسيتەت تاشكەنت يرريگاسيا جانە اۋىلشارۋاشىلىعىن مەحانيكالاندىرۋ ينجەنەرلەرى ينستيتۋتىمەن قوسديپلومدى ءبىلىم بەرۋدىڭ بىرلەسكەن باعدارلاماسىن ىسكە قوستى. تاراز قالاسىندا جەكە ۇلتتىق سۋ شارۋاشىلىعى جانە يرريگاسيا ۋنيۆەرسيتەتى اشىلدى. ەندىگى ماقساتىمىز - وسى وقۋ ورىندارىنا شەتەلدىك ۇزدىك پروفەسسور-وقىتۋشىلاردى اكەلۋ. ءبىز قازاقستانعا كەلۋگە نيەتتى نەمەسە قاشىقتان وقىتۋعا دايىن ماماندارمەن جۇمىس ىستەۋگە ءازىرمىز»، - دەدى نۇرجان نۇرجىگىتوۆ.
ارميدا اليشاحبانا مينيسترلىكتىڭ سۋ رەسۋرستارىن دامىتۋ جانە قورعاۋ، سونداي-اق ارال تەڭىزىن قالپىنا كەلتىرۋ جوبالارىن جوعارى باعالادى.
«ءبىز ءوز تاراپىمىزدان قازاقستان رەسپۋبليكاسىنىڭ «حالىقارالىق ارالدى قۇتقارۋ» قورىنا ءتوراعالىعى اياسىندا ورتالىق ازيا مەملەكەتتەرىنىڭ ترانسشەكارالىق سۋ رەسۋرستارىن پايدالانۋ ماسەلەسىن رەتتەۋگە كومەك كورسەتۋگە دايىنبىز. سونداي-اق، قازاقستاندىق مامانداردى سۋ سالاسىندا تاجىريبە الماسۋ ماقساتىندا ۇيىمداستىرىلاتىن ءبىزدىڭ ءتۇرلى ءىس-شارالارىمىزعا جانە مۇزدىقتاردى قورعاۋ جونىندەگى حالىقارالىق جوباعا قاتىسۋعا شاقىرامىز»،- دەدى بۇۇ ازيا جانە تىنىق مۇحيتى وڭىرىنە ارنالعان ەكونوميكالىق جانە الەۋمەتتىك كوميسسيانىڭ اتقارۋشى حاتشىسى ارميدا اليشاحبانا.