اەس سالۋدى قولداۋ جونىندەگى حالىقتىق شتاب وڭىرلەردە سايلاۋشىلارمەن كەزدەسۋ جۇمىسىن باستادى. شتاب مۇشەلەرى الدىمەن تۇركىستان وبلىسىنا باردى.
تۇركىستاندا حالىقتىق شتاب مۇشەلەرى ءوڭىر اكتيۆىمەن جۇزدەسىپ، وعان 300-دەن استام ادام قاتىستى. ءماجىلىس سپيكەرى، «AMANAT» پارتياسىنىڭ ءتوراعاسى ەرلان قوشانوۆ شتاب مۇشەلەرى اەس سالۋدىڭ ماڭىزى تۋرالى ازاماتتارمەن اشىق اڭگىمەلەسۋ جانە وسى جوبانى جۇزەگە اسىرۋعا بايلانىستى جاڭا پەرسپەكتيۆالار تۋرالى ايتۋ ءۇشىن وڭىرگە كەلگەنىن مالىمدەدى.
ءماجىلىس ءتوراعاسى تۇركىستاندىقتار ەل پرەزيدەنتى قاسىم-جومارت توقايەۆتىڭ قازاقستاندىقتاردىڭ ءال-اۋقاتىن ارتتىرۋ جونىندەگى پروگرەسسيۆتى باستامالارى مەن ساياساتىن ءاردايىم قولداپ كەلە جاتقانىن جەتكىزدى. سونداي-اق، ول اەس سالۋ – ەلىمىزدىڭ ەنەرگەتيكالىق تاۋەلسىزدىگى مەن قاۋىپسىزدىگىنىڭ كەپىلى ەكەنىن ايرىقشا اتاپ ءوتتى.
«بىزگە تازا، سارقىلماس قۋات كوزدەرى كەرەك. ءبىر اقيقات بار: ءقازىر اتوم ەنەرگياسىنا بالاما جوق. قازاقستاندا اتوم ەلەكتر ستانسياسىن سالۋ – بۇگىنگى كۇننىڭ شىندىعىنان، بۇگىنگى كۇننىڭ سۇرانىسىنان تۋعان باستاما. اەس ەكونوميكانىڭ درايۆەرىنە، قوزعاۋشى كۇشىنە اينالادى. جوعارى بىلىكتى جانە جوعارى جالاقى تولەنەتىن مىڭداعان جاڭا جۇمىس ورىندارى پايدا بولادى. اەس قۇرىلىسى ونىڭ اينالاسىنداعى ينفراقۇرىلىمدى دامىتاتىنى ايتپاسا دا تۇسىنىكتى: جاڭا جولدار، مەكتەپتەر، اۋرۋحانالار جانە تۇرعىن ۇيلەر سالىنادى»، – دەدى ول.
ەرلان قوشانوۆ ەلەكتر ەنەرگيا تاپشىلىعى بۇگىندە ەلىمىزدىڭ وڭتۇستىك وڭىرلەرىندە ايرىقشا سەزىلەتىنىن اتاپ ءوتتى. بىلتىرعى قورىتىندى بويىنشا دەفيسيت 3،1 ملرد كۆت/ساع قۇرادى. سالىستىرۋ ءۇشىن ايتا كەتسەك، ورتاشا ەسەپپەن 100 مىڭ تۇرعىنى بار ءبىر قالا 700 ملن كۆت/ساع تۇتىنادى. ەلەكتر ەنەرگيا جەتىسپەۋشىلىگى جاڭا ءوندىرىس ورىندارىن اشۋعا، بيزنەستى، اوك-نى دامىتۋعا، جاڭا جۇمىس ورىندارىن قۇرۋعا جانە تۇتاستاي العاندا ەلىمىزدەگى وزگە دە سالالاردى دامىتۋعا كەدەرگى كەلتىرەتىن فاكتور بولىپ وتىر.
«اەس سالۋ يدەياسى – مىڭ ويلانىپ، مىڭ تولعانىپ، قابىلدانعان شەشىم. بۇل – ءبىزدىڭ ەنەرگەتيكالىق تاۋەلسىزدىگىمىز بەن قاۋىپسىزدىگىمىزدىڭ كەپىلى. ءبىزدىڭ شىن مانىندەگى ارمان-ماقساتىمىز – پرەزيدەنت ايتقان داۋلەتتى، دەربەس قازاقستاندا تۇرۋ. ال، ونىڭ ورىندالۋى وسىنداي تاريحي قادامداردان باستالادى»، – دەدى ءماجىلىس ءتوراعاسى.