پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا جۇمىسشى ماماندىقتارى بويىنشا كادر دايارلاۋ جانە ولاردىڭ بىلىكتىلىگىن جەتىلدىرۋ، سونداي-اق اتالعان كاسىپتەردىڭ بەدەلىن ارتتىرۋ جونىندەگى شارالار قارالدى.
ماسەلەگە قاتىستى وقۋ-اعارتۋ، عىلىم جانە جوعارى ءبىلىم، ەڭبەك جانە حالىقتى الەۋمەتتىك قورعاۋ مينيسترلەرى بايانداما جاسادى. سونداي-اق «اتامەكەن» ۇكپ ءتوراعاسى رايىمبەك باتالوۆ جانە وڭىرلىك كوللەدج باسشىلارى تىڭدالدى، دەپ حابارلايدى aqshamnews.kz ۇكىمەتتىڭ رەسمي اقپاراتتىق رەسۋرسىنا سىلتەمە جاساپ.
2025 جىل جۇمىسشى ماماندىقتارى جىلى دەپ جاريالانىپ، كاسىپتىك-تەحنيكالىق ءبىلىم بەرۋدى ەلەۋلى تۇردە قايتا جاڭعىرتۋ جوسپارلانۋدا. اتالعان وزگەرىستەر كادرلار دايارلاۋعا زاماناۋي جاعداي جاساۋعا باعىتتالعان. بۇگىنگى تاڭدا قازاقستاندىق 772 كوللەدجدە 15 باعىت بويىنشا ماماندار دايارلانۋدا. جۇمىسشى ماماندىقتارى بويىنشا جۇمىسقا ورنالاسۋ دەڭگەيى 70%-عا جەتەدى.
ۇكىمەت باسشىسى ەكونوميكانىڭ ورنىقتى ءوسۋى مەن جاڭا وندىرىستەردى اشۋ كەزىندە ەلىمىزدە بىلىكتى جۇمىسشىلاردىڭ جەتىسپەيتىنىن اتاپ ءوتتى. بىلىكتى كادرلار دايارلاۋ – مەملەكەتتىك ساياساتتىڭ ماڭىزدى باسىمدىعى بولىپ قالا بەرمەك. سوندىقتان ەڭبەك نارىعىنىڭ، بيزنەستىڭ جانە ءبىلىم الۋشى جاستاردىڭ مۇددەلەرى مەن قاجەتتىلىكتەرىن ەسكەرەتىن جۇيەلى شارالار كەشەنىن ازىرلەۋ كەرەك.
سوڭعى جىلدارى كاسىپتىك تەحنيكالىق ءبىلىم بەرۋ جۇيەسىن دامىتۋدا ءبىرقاتار پروگرەسسيۆتى قادامدار جاسالدى. ءقازىر كوللەدجدەر جۇمىسشى ماماندىقتارى بويىنشا تەگىن وقىتادى، كادرلار دايارلاۋعا ارنالعان مەملەكەتتىك تاپسىرىس كولەمى ايتارلىقتاي ۇلعايتىلدى. بۇعان دەيىن كوللەدجدەرگە بيۋدجەت ەسەبىنەن جىل سايىن 93 مىڭعا جۋىق ستۋدەنت قابىلدانىپ كەلسە، اعىمداعى جىلى ولاردىڭ سانى 142،5 مىڭعا دەيىن جەتتى. بيىل كوللەدج ستۋدەنتتەرىنىڭ ستيپەنديالارى 50%-عا ءوستى. سونىمەن قاتار ءبىلىم بەرۋ ۇيىمدارىنىڭ ماتەريالدى-تەحنيكالىق بازاسىن جاقسارتۋ بويىنشا جۇمىستار جالعاسۋدا. «جاس مامان» جوباسى اياسىندا 180 كوللەدجدى قايتا جاراقتاندىرۋ ءۇشىن رەسپۋبليكالىق بيۋدجەتتەن 48 ملرد تەڭگە ءبولىندى.
پرەمەر-مينيستر قابىلدانعان شارالارعا قاراماستان، كادر دايارلاۋداعى الەۋەتى جەتكىلىكتى تۇردە اشىلماعانىنا – كاسىپتىك-تەحنيكالىق ءبىلىم بەرۋ جۇيەسىن جاڭعىرتۋ قاجەتتىگىنە نازار اۋداردى.
«حالىقارالىق سالالىق ستاندارتتار مەن سەرتيفيكاتتاۋدى بەلسەندى تۇردە ەنگىزۋ قاجەت. ول ءۇشىن وقۋ-اعارتۋ مينيسترلىگى جۇمىستىڭ ساپاسىنا تاۋەلسىز باعالاۋ جۇرگىزۋى كەرەك. سونداي-اق تەحنولوگيالىق كوشباسشىلاردى ايقىنداي وتىرىپ، كوللەدجدەردى كاسىبي بەيىمدەۋ مەن سارالاۋدى اياقتاۋى قاجەت»، — دەپ اتاپ ءوتتى ولجاس بەكتەنوۆ. ءبىلىم بەرۋ ۇيىمدارىن ىنتالاندىرۋ جۇيەسى مەن بەلگىلەنگەن KPI كوللەدجدەردى وقۋ ساپاسىن ارتتىرۋعا تالپىندىرادى.
نەگىزگى مىندەت – تەحنيكالىق جانە كاسىپتىك ءبىلىم بەرۋدى رەفورمالاۋ بويىنشا كەشەندى جوسپار ازىرلەۋ. ءتيىستى تاپسىرما مۇددەلى مەملەكەتتىك ورگاندارمەن، اكىمدىكتەرمەن، «اتامەكەن» پالاتاسىمەن بىرلەسە ورىنداۋ ءۇشىن وقۋ-اعارتۋ مينيسترلىگىنە بەرىلدى. قۇجات كوللەدجدەردى تەحنيكالىق جاعىنان قامتاماسىز ەتۋ، وقىتۋشىلار قۇرامى مەن وقۋ باعدارلامالارىنا قويىلاتىن تالاپتار، كوللەدجدەردىڭ جۇمىس ساپاسىن باعالاۋ جانە ولاردى قارجىلاندىرۋ باعىتىندا ناقتى شارالاردى قامتۋى ءتيىس.
سونداي-اق ۇكىمەت باسشىسى ۋنيۆەرسيتەتتەر مەن كوللەدجدەردىڭ ءبىلىم بەرۋ باعدارلامالارى اراسىنداعى ساباقتاستىقتى قامتاماسىز ەتۋ قاجەتتىگىن اتاپ ءوتتى. بۇگىندە ەلىمىزدەگى 30 جەتەكشى جوعارى وقۋ ورنى سايكەس ءبىلىم بەرۋ باعدارلامالارىن جۇزەگە اسىراتىن 100-دەن استام كوللەدجدەرمەن سەرىكتەستىك ورناتقان.
«دۋالدى وقىتۋدى بەلسەندى دامىتىپ، مەملەكەتتىك تاپسىرىس شەڭبەرىندە كادرلاردى ناقتى كاسىپورىندار ءۇشىن ماقساتتى دايارلاۋ جۇيەسىن كەڭەيتۋ قاجەت. كوللەدجدەر جاستارىمىز بەن جۇمىس بەرۋشىلەر جانە ينۆەستورلار ءۇشىن «تارتىلىس ورتالىعىنا» اينالۋعا ءتيىس»، — دەپ اتاپ ءوتتى ولجاس بەكتەنوۆ.
ەڭبەك مينيسترلىگىنە «اتامەكەن» پالاتاسى سالالىق مەملەكەتتىك ورگاندارمەن بىرلەسىپ، ءتيىستى ەۋروپالىق جىكتەۋىش نەگىزىندە سيفرلىق داعدىلار بانكىن، ال ۇلتتىق بىلىكتىلىك جۇيەسىنىڭ سيفرلىق پلاتفورماسى نەگىزىندە تۇلەكتەردىڭ جۇمىسقا ورنالاسۋىنا جاردەمدەسۋ ءۇشىن سەرتيفيكاتتالعان كوللەدج تۇلەكتەرىنىڭ ءتىزىلىمىن قۇرۋتاپسىرىلدى. اتالعان سيفرلىق شەشىمدەر تۇلەكتەردى جۇمىسقا ورنالاستىرۋ پروسەسىن جاقسارتۋعا مۇمكىندىك بەرەدى.
سونىمەن قاتار پرەمەر-مينيستر كاسىپكەرلىك بلوكتى وقۋ ۇدەرىسىنە تارتۋدىڭ جانە جۇمىسشى كاسىپتەرى بويىنشا كادرلار دايارلاۋدىڭ ماڭىزدىلىعىن اتاپ ءوتتى.
«الەمدىك تاجىريبە كورسەتىپ وتىرعانداي، كادر دايارلاۋ ساپاسى مەملەكەت، كاسىپورىندار مەن وقۋ ورىندارى اراسىنداعى جاۋاپكەرشىلىكتىڭ ارا-جىگىن ناقتى ءبولۋ ەسەبىنەن قامتاماسىز ەتىلەدى. سوندىقتان ءبىز بيزنەستىڭ وسى پروسەستەگى ءرولى مەن بەلسەندىلىگىن ارتتىرعىمىز كەلەدى. ءبىزدىڭ بىرلەسكەن جۇمىسىمىزداعى ەڭ باستى ماقسات – كوللەدج تۇلەكتەرى ەڭبەك نارىعىندا سۇرانىسقا يە بولىپ، لايىقتى جالاقى الۋى ءتيىس»، — دەپ تولىقتىردى ولجاس بەكتەنوۆ.
جۇمىسشى ماماندىقتارىنىڭ مارتەبەسىن ارتتىرۋ جانە كاسىپتىك-تەحنيكالىق ءبىلىم بەرۋ جۇيەسىن دامىتۋ جونىندەگى جۇمىس شەڭبەرىندە وقۋ-اعارتۋ، عىلىم جانە جوعارى ءبىلىم مينيسترلىكتەرىنە ۇقساس ماماندىقتار بويىنشا ۋنيۆەرسيتەتتەردە وقۋىن جالعاستىرىپ جاتقان كوللەدج تۇلەكتەرىنە ارنالعان گرانتتار سانىن ۇلعايتا وتىرىپ، مەملەكەتتىك تاپسىرىس قۇرىلىمىن قايتا قاراۋ تاپسىرىلدى.