قازاقستان رەسپۋبليكاسى ۇكىمەتىنىڭ قاۋلىسىمەن ەرلان اڭساعان ۇلى قياسوۆ بەرگەن وتىنىشىنە سايكەس ق ر دەنساۋلىق ساقتاۋ ۆيسە-مينيسترى — ق ر باس مەملەكەتتىك سانيتارلىق دارىگەرى قىزمەتىنەن بوساتىلدى، دەپ حابارلايدى اlmaty-akshamy.kz ق ر پرەمەر-مينيسترىنىڭ باسپا ءسوز قىزمەتىنە سىلتەمە جاساپ.
ەرلان قياسوۆ 1973 جىلى الماتى وبلىسىندا دۇنيەگە كەلگەن.
قازاق مەملەكەتتىك مەديسينا ۋنيۆەرسيتەتىن، ورتالىق ازيا ۋنيۆەرسيتەتىن، ءال-فارابي اتىنداعى قازاق ۇلتتىق ۋنيۆەرسيتەتىن، تۇران-استانا ۋنيۆەرسيتەتىن ءتامامداعان.
ەڭبەك جولىن 1990 جىلى «الماتى قالاسىنىڭ جەدەل مەديسينالىق جاردەم اۋرۋحاناسى» رەانيماسيا جانە قارقىندى تەراپيا بولىمشەسىنىڭ سانيتارى بولىپ باستادى.
1997-1999 جىلدارى — الماتى قالاسىنداعى ق ر اۋە كولىگىندەگى ورتالىق سانيتارلىق-ەپيدەميولوگيالىق ستانسياسىنىڭ سانيتارلىق دارىگەرى، دارىگەر-ەپيدەميولوگى.
1999 جىلدان باستاپ 2020 جىلعا دەيىن ق ر پرەزيدەنتى ءىس باسقارماسىنىڭ مەديسينالىق ورتالىعىنىڭ قۇرىلىمىندا — سانيتارلىق-ەپيدەميولوگيالىق ستانسيادا جالپى گيگيەنا بويىنشا سانيتارلىق دارىگەر، جەدەل ءبولىم مەڭگەرۋشىسى، سانەپيدقاداعالاۋ باسقارماسىنىڭ ەپيدەميولوگيالىق ءبولىمىنىڭ باستىعى، «سانيتارلىق-ەپيدەميولوگيالىق ساراپتاما ورتالىعى» رمك ديرەكتورى، باسشىنىڭ ورىنباسارى بولىپ جۇمىس ىستەدى.
2020 جىلعى قىركۇيەكتە ق ر دەنساۋلىق ساقتاۋ ۆيسە-مينيسترى – ق ر باس مەملەكەتتىك سانيتارلىق دارىگەرى بولىپ تاعايىندالدى.