قازاقستان رەسپۋبليكاسى سىرتقى ىستەر مينيسترلىگى قازاقستان رەسپۋبليكاسىنىڭ يۋنەسكو جانە يسەسكو ىستەرى جونىندەگى ۇلتتىق كوميسسياسى جانە حالىقارالىق ورتالىق ازيا زەرتتەۋلەر ينستيتۋتىمەن بىرلەسە وتىرىپ، قازاقستاندىق ديپلوماتتاردىڭ مادەني جانە تابيعي مۇرانى ساقتاۋ سالاسىنداعى الەۋەتىن ارتتىرۋعا باعىتتالعان جىل سايىنعى كۋرستاردى وتكىزدى، دەپ حابارلايدى aqshamnews.kz
Cىرتقى ىستەر مينيسترلىگىنىڭ مالىمەتىنشە، 2022 جىلدان باستاپ ىسكە اسىرىلىپ كەلە جاتقان باعدارلاما ديپلوماتتاردىڭ كاسىبي دايارلىعىن ارتتىرۋ جانە الەمدىك ارەنادا مادەني جانە تابيعي قۇندىلىقتاردى ىلگەرىلەتۋ ماقساتىندا الەمدىك مۇرانى ساقتاۋ جونىندەگى حالىقارالىق قۇرالداردى قولدانۋ تۋرالى تەوريالىق جانە تاجىريبەلىك ءبىلىم بەرەدى.
بۇل كۋرستار قازاقستان اۋماعىندا العاش رەت ۇيىمداستىرىلدى. جەتەكشى وڭىرلىك جانە حالىقارالىق ساراپشىلارمەن بىرگە كۋرس قاتىسۋشىلارى يۋنەسكو-نىڭ دۇنيەجۇزىلىك مۇرانىڭ نەگىزگى نىساندارى – قوجا احمەت ياساۋي كەسەنەسى مەن اقسۋ-جاباعلى تابيعي قورىعىن، سونداي-اق تۇركىستان، وتىرار، ساۋران، كۇلتوبە ەجەلگى قالاشىقتاردى قوسا العاندا، «ۇلى جىبەك جولى» ترانسۇلتتىق نوميناسياسىنىڭ الەۋەتتى ەسكەرتكىشتەرىن ارالاپ كوردى.
بۇل باعدارلاما قازاقستاننىڭ جوعارى حالىقارالىق ستاندارتتارعا سايكەس ءوزىنىڭ بىرەگەي مۇراسىن ساقتاپ قالۋعا دەگەن بەيىلدىلىگىن كورسەتەدى.
يۋنەسكو-نىڭ دۇنيەجۇزىلىك مۇرا تىزىمىنە قازاقستاننان التى نوميناسيا شەڭبەرىندە ون جەتى نىسان ەنگىزىلگەن، بۇل يۋنەسكو-نىڭ دۇنيەجۇزىلىك مادەني جانە تابيعي مۇرالاردى قورعاۋ تۋرالى كونۆەنسياسىنا سايكەس ولاردىڭ ساقتالۋىن قامتاماسىز ەتەدى. قازىرگى ۋاقىتتا قازاقستان دۇنيەجۇزىلىك مۇرا كوميتەتىنىڭ مۇشەسى بولا وتىرىپ، يۋنەسكو-نىڭ وسى بەدەلدى تىزىمىنە جاڭا نىسانداردى ەنگىزۋ جونىندەگى شەشىمدەردى قابىلداۋدا جانە ولاردى قورعاۋ جونىندە ۇسىنىستار بەرەدى.