قالا كۇنىن مەرەكەلەۋ ونلاين فورماتتا ءارى سانيتارلىق نورمالاردى ساقتاي وتىرىپ وتەدى: قالا تۇرعىندارىن قاۋىپسىزدىك تالاپتارىن ورىنداۋعا شاقىرادى.
الماتى قالاسى اكىمىنىڭ ورىنباسارى ەرجان باباقۇماروۆ جىل سايىن قىركۇيەك ايىنىڭ ءۇشىنشى جەكسەنبىسىندە الماتىلىقتار اتاپ وتەتىن قالا كۇنىن مەرەكەلەۋدى ۇيىمداستىرۋ بويىنشا ونلاين فورماتتا جۇمىس كەڭەسىن وتكىزدى، دەپ حابارلايدى almaty-akshamy.kz
بيىل قالا كۇنىنە وراي ءىس-شارالاردى وتكىزۋدىڭ ەكى نۇسقاسى ازىرلەندى، اتاپ ايتقاندا، سانيتارلىق-ەپيدەميولوگيالىق احۋالدىڭ دامۋىنا بايلانىستى وفلاين جانە ونلاين-شارالار قاراستىرىلعان.
قالالىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى، مەگاپوليستىڭ باس مەملەكەتتىك سانيتارلىق دارىگەرى ج. بەكشين الماتىدا سوڭعى تاۋلىكتەردە كوروناۆيرۋس ينفەكسياسىنا قاتىستى وڭ پتر ساراپتاماسى بار 704 ناۋقاستىڭ انىقتالعانىن، بۇل جۇقتىرۋدىڭ 0،49%-عا وسكەنىن كورسەتەتىنىن ايتتى. «سيمپتومدى» ناۋقاستاردىڭ ۇلەسى ارتۋدا، 9 قىركۇيەكتە 96%-عا جەتتى. دەمەك، پاندەميا ديناميكاسى تۇراقسىز. سوندىقتان كوروناۆيرۋس ينفەكسياسىنىڭ تارالۋىنىڭ الدىن الۋ ءارى قالا كۇنىن ەسكەرە وتىرىپ، سانيتارلىق-ەپيدەميولوگيالىق شارالاردى كۇشەيتۋ قاجەت.
سونىمەن قاتار، كاسىپكەرلىك سۋبەكتىلەرى اراسىندا ەپيدەميولوگيالىق قاۋىپسىزدىكتىڭ بەلگىلەنگەن تالاپتارىن بۇزۋ جاعدايلارىن تىركەۋ جالعاسۋدا. تەك اعىمداعى جىلدىڭ 9-12 قىركۇيەگى ارالىعىندا زاڭدى تۇلعالاردىڭ كارانتيندىك شارالاردى بۇزعانى جونىندە 34 فاكتى انىقتالدى، سونىڭ ىشىندە ماسكا رەجيمىن ساقتاماۋ بويىنشا. بۇقارالىق شارالار وتەتىن بولسا،وندا جۇقتىرۋ ءقاۋپىنىڭ ارتا تۇسەتىنى انىق.
كەڭەستى قورىتىندىلاعان الماتى قالاسى اكىمىنىڭ ورىنباسارى ەرجان باباقۇماروۆ ەپيدەميولوگيالىق احۋالدىڭ تۇراقسىز ءارى الماتى قالاسىنىڭ ءالى دە «قىزىل» ايماقتا ەكەنىن ەسكەرە وتىرىپ، بارلىق مادەني ءىس-شارالاردى ونلاين رەجيمدە وتكىزۋگە شەشىم قابىلدانعانىن ايتتى. وفلاين فورماتتا وتەتىن بارلىق مادەني، ويىن-ساۋىق جانە بۇقارالىق كوڭىل كوتەرەتىن ءىس-شارالار توقتاتىلدى.
الماتىدا قالا كۇنىن مەرەكەلەۋ اياسىندا ءبىرقاتار نىساندار اشىق بولادى، ياعني سكۆەرلەر مەن ساياباقتار، بالاباقشالار، مەكتەپتەر جانىنداعى جاڭا كورپۋستار جۇمىس جاسايدى، از قامتىلعان جانە كوپبالالى وتباسىلارعا پاتەر كىلتتەرى تاپسىرىلادى جانە جانە ت.ب. ۆاكسينالانعان قالالىقتار كارانتيندىك شەكتەۋلەردى قاتاڭ ساقتاي وتىرىپ، الەۋمەتتىك جانە قايىرىمدىلىق شارالارىنا قاتىسا الادى.
قالا كۇنىن مەرەكەلەۋ كەزىندە مەگاپوليس تۇرعىندارى مەن قوناقتارى دەرتتى جۇقتىرماۋى ءتيىس. سوندىقتان، مونيتورينگتىك توپتار پوليسيا دەپارتامەنتىمەن بىرگە اعىمداعى جىلدىڭ 19 قىركۇيەگىنەن باستاپ الداعى اپتالاردا بەلگىلەنگەن شەكتەۋلەردى باقىلاۋ شارالارىن كۇشەيتەتىن بولادى. سونىمەن قاتار، اۋداندار اكىمدىكتەرى ەرىكتىلەر ۇيىمدارىن تارتا وتىرىپ، ادامدار كوپ جينالاتىن جەرلەردە سانيتارلىق پوستتار مەن پاترۋلدەردىڭ جۇمىستارىن جانداندىرادى. قالالىق قوعامدىق دەنساۋلىق باسقارماسى ۆاكسينالانۋدى كەڭەيتۋ بويىنشا جۇمىستى جالعاستىرادى، قالالىقتارعا ىڭعايلى بولۋ ءۇشىن جىلجىمالى ەگۋ پۋنكتتەرى جۇمىس ىستەيتىن بولادى.
الماتى قالاسىنىڭ اكىمدىگى COVID-19-عا قارسى ۆاكسينالانۋعا جانە پروفيلاكتيكالىق شارالاردى ساقتاۋعا شاقىرادى. بەتپەردە تاعۋدى، الەۋمەتتىك قاشىقتىقتى ساقتاۋدى ەستە ۇستاعان ءجون. وتكەن تاۋلىكتە ءبىرىنشى كومپونەنتپەن 3 033 ادام، ەكىنشى كومپونەنتپەن 3 448 ادام ەگىلدى. بارلىق كەزەڭ ىشىندە 919 907 ادامعا I كومپونەنت، 807 786 ادامعا II كومپونەنت سالىندى. الايدا ۆاكسينا العاندار سانى ەكى ميلليوندىق مەگاپوليستە ۇجىمدىق يممۋنيتەتتى قالىپتاستىرۋ ءۇشىن جەتكىلىكسىز. اعىمداعى جىلدىڭ 16 قىركۇيەگىندەگى حالىقتىڭ يممۋندىق قاباتى حالىقتىڭ رەسمي سانىنىڭ 48%-ىن قۇرادى. الماتىلىقتاردى ۆاكسينالانۋعا شاقىرادى، ول ءۇشىن مەديسينالىق ۇيىمداردا، مەكتەپتەردە، مادەنيەت جانە سپورت نىساندارىندا، بازارلاردا جانە قالانىڭ سوسو 160 ەگۋ پۋنكتى جۇمىس ىستەيدى.