الماتىدا كۆي-دىڭ تاۋلىكتىك ءوسىمى 25 تامىزدان باستاپ 1،16-دان 0،2%-عا دەيىن تومەندەدى. قالادا ينفەكسيالار سانىنىڭ تومەندەۋى شامامەن 74% قۇرادى. بۇل تۋرالى ق ر پرەزيدەنتى جانىنداعى ورتالىق كوممۋنيكاسيالار قىزمەتىنىڭ باسپا ءسوز كونفەرەنسياسىندا الماتى اكىمىنىڭ ورىنباسارى ەرجان باباقۇماروۆ مالىمدەدى، دەپ حابارلايدى almaty-akshamy.kz
الماتى اكىمى ورىنباسارىنىڭ مالىمەتىنشە، اعىمداعى جىلدىڭ باسىنان بەرى كۆي-دىڭ 152 مىڭنان استام جاعدايى تىركەلگەن (152 298). ونىڭ ىشىندە اعىمداعى جىلدىڭ 19 شىلدەسىنەن باستاپ 6 قازانعا دەيىن 85 000 جاعداي تىركەلگەن.
«2020 جىلدىڭ جازىندا جانە 2021 جىلدىڭ باسىندا ءبىز «ۋحان» شتامىمەن بايلانىستى ەكى تولقىننان وتتىك. 2021 جىلدىڭ كوكتەمىندە – «الفا» شتامىمەن تۋىنداعان تولقىن. 19 شىلدەدە «دەلتا» شتامىنان تۋىنداعان ينفەكسيانىڭ ەڭ اۋىر تولقىنى باستالدى. بۇگىن ءبىز وسى تولقىننان شىقتىق»، - دەدى ەرجان باباقۇماروۆ.
29 شىلدە مەن 25 تامىز ارالىعىندا الماتى جاعدايلاردى تىركەۋدىڭ جوعارعى قاباتىندا بولدى (1500-1600 جاعداي). 26 تامىزدان باستاپ قازىرگى ۋاقىتقا دەيىن، 7 قازانداعى جاعداي بويىنشا ينفەكسيانىڭ تومەندەۋى جالعاسۋدا - 1600-دان 423-كە دەيىن.
«سالىستىرمالى تالداۋ مىنانى كورسەتەدى. ەگەر ءبىرىنشى تولقىن كەزىندە الماتىدا تاۋلىگىنە جۇقتىرعاندار سانى 250 بولسا، ەكىنشى جانە ءۇشىنشى تولقىن كەزىندە – شامامەن 400 جانە 700 بولسا، "دەلتا" شتامىندا تاۋلىگىنە جۇقتىرۋ دەڭگەيى 1600 جانە ودان دا كوپ بولدى»، - دەپ حابارلادى مەگاپوليس اكىمىنىڭ ورىنباسارى.
ونىڭ ايتۋىنشا، «دەلتانىڭ» شارىقتاۋ شەگىندە "جەدەل جاردەم" شاقىرۋلارىنىڭ سانى ەكى ەسەدەن استام – 4000-عا دەيىن ءوستى، ولاردىڭ 45%-ى كۆي جانە كوۆيدتى ەتيولوگيانىڭ پنيەۆمونياسىمەن بايلانىستى بولدى.
بۇل رەتتە كۆي ءتورتىنشى تولقىنى كەزىندە ستاسيونارلارعا ەمدەۋگە جاتقىزۋ دەڭگەيى 5 ەسەدەن استام ءوستى.
ەگەر ءبىرىنشى تولقىن كەزىندە اۋرۋحاناعا جاتقىزۋ تاۋلىگىنە 250 ادامعا دەيىن، ەكىنشى جانە ءۇشىنشى تولقىن كەزىندە - 400-450-گە دەيىن بولسا، ءتورتىنشى تولقىن كەزىندە اۋرۋحاناعا جاتقىزۋ دەڭگەيى ەكى ەسە جوعارى بولدى جانە تاۋلىگىنە 800 پاسيەنتكە جەتتى.
«جالپى، دەنساۋلىق ساقتاۋ جۇيەسى اۋىر جۇكتەمەلەرگە توتەپ بەردى، دارى-دارمەكتەر مەن جقق قورى جەتكىلىكتى قامتاماسىز ەتىلدى، ىركىلىستەر بولعان جوق»، - دەپ اتاپ ءوتتى ەرجان باباقۇماروۆ.