مەملەكەت باسشىسى جۇمىسشى ماماندىقتاردىڭ بەدەلىن ارتتىرۋ، تەحنيكالىق جانە كاسىپتىك ءبىلىم بەرۋ جۇيەسىن رەفورمالاۋ قاجەتتىگىن ايتتى جانە دە جۇمىسشى ماماندىقتارىن دارىپتەۋ ارقىلى قوعامدا ەڭبەكقور جانە ناعىز مامان بولۋ يدەياسىن ناسيحاتتاۋدى ۇسىنىپ وتىر.
بۇگىندە ەلىمىزدەگى ونەركاسىپتىڭ نەگىزگى سالالارىندا ماماندار تاپشىلىعى ايقىن بىلىنەدى. قازىرگى قوعامدا كوپتەگەن جاستار كەڭسەدە جۇمىس ىستەۋگە نەمەسە كاسىپكەر بولۋعا ۇمتىلادى. دەگەنمەن، جۇمىسشى ماماندىقتارى ءارقاشان سۇرانىسقا يە ەكەنىن ءومىردىڭ ءوزى دالەلدەپ وتىر.
تەحنيكالىق مامانداردى دايارلاۋدا كاسىپتىك جانە تەحنيكالىق ءبىلىم بەرۋ ۇيىمدارىنىڭ ۇلەسى زور. سولاردىڭ ءبىرى الماتى تەحنولوگيا جانە فلوريستيكا كوللەدجى جىل سايىن 400-دەي جۇمىسشى ماماندى وقىتىپ، ەڭبەك نارىعىنا قاجەت بىلىكتى ماماندار دايىنداپ شىعارادى. كوللەدجدە ەرەكشە ءبىلىم بەرۋ قاجەتتىلىكتەرى بار ستۋدەنتتەر دە ءبىلىم الادى. اتالمىش كوللەدج العاشقىلاردىڭ ءبىرى بولىپ 1993 جىلى ەرەكشە ءبىلىم بەرۋ قاجەتتىلىكتەرى بار ستۋدەنتتەردى «تىگىن ءوندىرىسى جانە كيىمدەردى ۇلگىلەۋ»، «ەسەپتەۋ تەحنيكاسى جانە اقپاراتتىق جەلىلەر»، «باق-ساياباق شارۋاشىلىعى»، «جيھاز ءوندىرىسى»، «اياق-كيىم ءىسى» ماماندىقتارى بويىنشا وقىتىپ، بىلىكتى ماماندار دايىنداي باستايدى. قازىرگى تاڭدا «ينكليۋزيۆتى ءبىلىم بەرۋ» بولىمىندە 211 ستۋدەنت وقىپ جاتسا، 173 ستۋدەنت ارنايى توپتا، 38 ستۋدەنت ينكليۋزيۆتى توپتا وقيدى.
«ينكليۋزيۆتى ءبىلىم بەرۋ» بولىمىندە بىلىكتى ماماندار ستۋدەنتتەردىڭ ساپالى ءبىلىم الۋىنا، تاڭداعان ماماندىقتارىن يگەرۋىنە دەگەن بارلىق كەدەرگىلەردى جويىپ، قوعامدىق ورتاعا الەۋمەتتىك بەيىمدەلۋىن قامتاماسىز ەتىپ وتىر. ەڭبەك نارىعىندا سۇرانىسقا يە ماماندار دايارلاۋ، ستۋدەنتتەردىڭ قۇزىرەتتىلىگىن ارتتىرۋ ماقساتىندا كوللەدج پەداگوگتارى قالالىق ءبىلىم باسقارماسىنىڭ قولداۋىمەن گەرمانيا، جۇڭگو، يتاليا، گوللانديا، وڭتۇستىك كورەيا، تۇركيا مەملەكەتتەرىنىڭ وقۋ ورىندارىندا بولىپ، حالىقارالىق تاعىلىمدامادان ءوتىپ قايتتى. ولار وسىلايشا كاسىبي بىلىكتىلىكتەرىن ارتتىرادى.
تاقىرىپقا وراي
اناربەك نۇرىمبەتوۆ، الماتى تەحنولوگيا جانە فلوريستيكا كوللەدجىنىڭ ديرەكتورى:
ۇزدىكتەر ساپىندامىز
قازىرگى تاڭدا كوللەدجدىڭ ماتەريالدىق-تەحنيكالىق بازاسى نىعايىپ، مودەرنيزاسيالاۋ جۇمىستارى ءجۇرىپ جاتىر. كوللەدج «جاس مامان» جوباسى اياسىندا ەلىمىزدەگى «ەڭ ۇزدىك 180 كوللەدجدىڭ» ءبىرى اتاندى. سونىمەن قاتار، «100 سۇرانىسقا يە ماماندىق» بايقاۋىنا قاتىسىپ، «تىگىن ءوندىرىسى جانە كيىمدى ۇلگىلەۋ» ماماندىعى بويىنشا بىلىكتى ماماندار دايارلاۋدىڭ حالىقارالىق تاجىريبەسىنە ەنىپ وتىر.
الماتى قالاسىنىڭ اكىمدىگى مەن الماتى قالاسى ءبىلىم باسقارماسىنىڭ ينۆەستور تارتۋىنىڭ ناتيجەسىندە «التىن ساپا ALM» ج ش س كوللەدجدەگى ەرەكشە ءبىلىم بەرۋدى قاجەت ەتەتىن ستۋدەنتتەرگە زاماناۋي ۇلگىدە سوعىلعان وقۋ عيماراتى سالىنىپ، وندا وقۋ عيماراتىنا كىرۋ، شىعۋ پاندۋستارى، شاقىرۋ نۇكتەلەرى، ليفت-كوتەرگىش، ارنايى جولاقتار بار، مۇندا برايل شريفتىمەن تاقتايشالار ارقىلى كەدەرگىسىز ءجۇرىپ-تۇرۋعا جان-جاقتى جاعداي جاسالعان.