ەلىمىزدەگى پوليگرافيا سالاسى قوعامدى اقپاراتتىق قامتاماسىز ەتۋدە، باسپا ونىمدەرىن شىعارۋدا
جانە مەديايندۋستريانى دامىتۋدا ماڭىزدى ءرول اتقارىپ كەلەدى.
سوڭعى جىلدارى تەحنولوگيالاردىڭ دامۋى مەن سالانىڭ سيفرلاندىرىلۋىنا بايلانىستى پوليگرافيا سالاسىنداعى ماماندىقتار جوعارى بىلىكتىلىكتى جانە زاماناۋي ستاندارتتارعا بەيىمدەلۋدى تالاپ ەتىپ وتىر.
قازاقستانداعى پوليگرافيا سالاسىن دامىتۋ ءۇشىن بىلىكتى جۇمىسشى كادرلاردى دايارلايتىن «پرينتمەديا تەحنولوگيالار كوللەدجى» 2024 جىلعا دەيىن «الماتى پوليگرافيا كوللەدجى» دەگەن اتاۋمەن بەلگىلى بولعان ەدى.
سوناۋ 1977 جىلى №28 تەحنيكالىق ۋچيليششە دەگەن اتاۋمەن قۇرىلعان مەكەمە ەلىمىزدەگى وسى سالاعا ماماندانعان جالعىز وقۋ ورنى بولىپ تابىلادى. كوللەدجدى بىتىرگەن تۇلەكتەر باسپا ماشينالارىن باسقارا الادى. سونىمەن قاتار، باسپا ساپاسىنا جاۋاپ بەرىپ، باسپا ونىمدەرىنىڭ (كىتاپتار، جۋرنالدار، جارنامالىق ماتەريالدار) كوركەمدىك ديزاينىن ازىرلەيدى. تەحنولوگيالىق پروسەستەردى باقىلايدى، باسپاعا قاجەتتى ماتەريالدار مەن ادىستەردى تاڭدايدى، ماكەتتەر مەن فايلداردى باسپاعا دايىندايدى، تۇستەردى تۇزەتۋ مەن باستاپقى ماتەريالداردىڭ ساپاسىن تەكسەرەدى. سونداي-اق، ولار دايىن باسپا ونىمدەرىن جيناقتاۋ جانە بەزەندىرۋ جۇمىستارىمەن دە اينالىسادى.
كوللەدج جۇمىسشى ماماندىقتارىن دايارلاۋ بارىسىندا تەوريالىق ءبىلىمدى سەرىكتەس كاسىپورىندارداعى پراكتيكالىق داعدىلارمەن ۇشتاستىرادى. بۇل مامانداردى جوعارى ساپادا دايىنداۋعا مۇمكىندىك بەرەدى.
كوللەدج زاماناۋي باسپا ماشينالارى مەن تەحنولوگيالارمەن جابدىقتالعان. بۇل ستۋدەنتتەرگە ەڭبەك نارىعىندا سۇرانىسقا يە زاماناۋي داعدىلاردى مەڭگەرۋگە مۇمكىندىك بەرەدى.
تاقىرىپقا وراي
گۇلزادا ابدۋللايەۆا، پرينتمەديا تەحنولوگيالار كوللەدجى ديرەكتورىنىڭ مىندەتىن اتقارۋشى:
ءبىز ەلىمىزدىڭ جەتەكشى پوليگرافيالىق كاسىپورىندارىمەن تۇراقتى بايلانىس ورناتتىق. بۇل قادام ەڭ الدىمەن كوللەدجدى بىتىرگەن تۇلەكتەردىڭ جۇمىسقا ورنالاسۋىنا زور ىقپال ەتىپ وتىر. سونىمەن قاتار، گەرمانيا، بەلارۋس، رەسەي، جۇڭگو، فرانسيا، ەستونيا جانە جاپونيانىڭ وقۋ ورىندارىمەن بەلسەندى تۇردە ىنتىماقتاستىق ورناتىلدى. بۇل رەتتە ارامىزدا تاجىريبە الماسۋ جانە شەتەلدە تاعىلىمدامادان ءوتۋ مۇمكىندىكتەرى اشىلدى.
قازىرگى تاڭدا قازاقستانداعى پوليگرافيا سالاسى زاماناۋي تەحنولوگيالىق ۇردىستەرگە بەيىمدەلە وتىرىپ، جۇمىسشى ماماندىعىنىڭ قارقىندى دامۋىنا ۇلەس قوسىپ جاتىر. پرينتمەديا تەحنولوگيالار كوللەدجى جوعارى دەڭگەيدە ءبىلىم بەرىپ، كاسىبي جۇمىسشى كادرلاردى قالىپتاستىرۋعا ۇلكەن ۇلەس قوسىپ وتىر.