الماتىدا دارىگەرلەر جاسى 40-تان اسقان ەر ادامداردى نەسەپ-جىنىس مۇشەلەرىنىڭ ىسىكتەرىن ەرتە انىقتاۋ ءۇشىن جۇيەلى تۇردە تەكسەرۋدەن وتۋگە شاقىرادى. وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا الماتى ونكولوگيالىق ورتالىعىنىڭ ونكولوگ-ۋرولوگى ايكەرىم وماروۆا كوپتەگەن ونكولوگيالىق اۋرۋلاردىڭ اسيمپتوماتيكالىق تۇردە دامىپ، تەك كەش ساتىسىندا عانا انىقتالاتىنىن ايتتى، دەپ حابارلايدى aqshamnews.kz.
«قۋىق استى بەزىنىڭ قاتەرلى ىسىگىن دەر كەزىندە انىقتاۋ ءۇشىن جىل سايىن قۋىق استى بەزىنىڭ سپەسيفيكالىق انتيگەنىنە تەست تاپسىرۋ قاجەت. ونىڭ جوعارىلاۋى ىسىك پروسەسىنىڭ باستالۋىن كورسەتۋى مۇمكىن. ەرتە دياگنوز ءساتتى ەمدەۋ مۇمكىندىگىن ايتارلىقتاي ارتتىرادى»، - دەپ اتاپ ءوتتى مامان.
نەسەپ-جىنىس مۇشەلەرىنىڭ قاتەرلى ىسىگى ءقاۋىپ فاكتورلارىنا 50 جاستان اسقان، سوزىلمالى قابىنۋ پروسەستەرى (پيەلونەفريت، پروستاتيت، سيستيت)، جامان ادەتتەر، سەمىزدىك، تۇقىم قۋالايتىن بەيىمدىلىك، ۋلى زاتتاردىڭ اسەر ەتۋ جاعدايىندا جۇمىس ىستەۋ جاتادى.
2024 جىلى الماتىدا 5209 قاتەرلى ىسىك اۋرۋى تىركەلدى. ونىڭ ىشىندە 518 جاعداي نەسەپ-جىنىس جۇيەسىنىڭ ىسىكتەرىمەن بايلانىستى بولدى. اتاپ ايتقاندا، 218 – قۋىق استى بەزىنىڭ وبىرى، 189 – بۇيرەك جاسۋشالى ىسىگى، 111 – قۋىق ىسىگى.
«الدىن الۋ جانە دەر كەزىندە مەديسينالىق تەكسەرۋدەن ءوتۋ – دەنساۋلىقتى ساقتاۋدىڭ كەپىلى. ەگەر سىزدە ءزار شىعارۋ، زارىڭىزدە قان نەمەسە بەلىڭىز اۋىرسا، دارىگەرگە بارۋدى كەشىكتىرمەڭىز»، - دەدى وماروۆا.