مەملەكەت باسشىسىنىڭ تاپسىرماسىن ىسكە اسىرۋ جانە ينكليۋزيۆتى، ارنايى ءبىلىم بەرۋدى جۇيەلى دامىتۋ ماقساتىندا ق ر وقۋ-اعارتۋ مينيسترلىگى «ەرەكشە ءبىلىم بەرۋ قاجەتتىلىكتەرى بار بالالاردى ارنايى پسيحولوگيالىق-پەداگوگيكالىق قولداۋ ستاندارتىن بەكىتۋ تۋرالى» بۇيرىق جوباسىن ازىرلەدى، دەپ حابارلايدى aqshamnews.kz
بۇل تۋرالى ۆەدومستۆونىڭ باسپا ءسوز قىزمەتى حابارلادى.
قۇجات ارنايى ءبىلىم بەرۋدىڭ شارتتارىنا، ساپاسى مەن مازمۇنىنا قويىلاتىن ءبىرىڭعاي ەڭ تومەنگى تالاپتاردى ايقىندايدى، سونداي-اق وسىنداي قولداۋ كورسەتۋگە جاۋاپتى ۇيىمدار مەن مامانداردىڭ قىزمەتىن رەتتەيدى. مەملەكەتتىك دەڭگەيدە العاش رەت ءبىلىم بەرۋدىڭ بارلىق ساتىلارىندا ەرەكشە ءبىلىم بەرۋ قاجەتتىلىكتەرى بار بالالاردى سۇيەمەلدەۋگە جۇيەلى ءتاسىل بەكىتىلەدى.
«بۇيرىق جوباسى بالالاردىڭ بارلىق ساناتتارى ءۇشىن ساپالى بىلىمگە تەڭ قولجەتىمدىلىكتى قامتاماسىز ەتۋ جولىنداعى ماڭىزدى قادام بولماق. ءقازىر سونداي-اق «ەرەكشە ءبىلىم بەرۋ قاجەتتىلىكتەرى بار بالالاردى كەشەندى قولداۋ تۋرالى» ق ر زاڭى ازىرلەنۋدە، ول بالالار مەن وتباسىلارىن ۆەدومستۆوارالىق سۇيەمەلدەۋدىڭ ينستيتۋسيونالدىق جانە قۇقىقتىق تەتىكتەرىن قامتيتىن بولادى»، - دەپ اتاپ ءوتتى ينكليۋزيۆتى جانە ارنايى ءبىلىم دەپارتامەنتىنىڭ ديرەكتورى لاۋرا بۋتابايەۆا.
ەستەرىڭىزگە سالا كەتەيىك، وتكەن جىلى مينيسترلىك ينكليۋزيۆتى جانە ارنايى ءبىلىم بەرۋ سالاسىنداعى نورماتيۆتىك بازاعا كەشەندى تالداۋ جۇرگىزدى. ونىڭ قورىتىندىسى بويىنشا 15 نورماتيۆتىك-قۇقىقتىق اكت بەكىتىلىپ، ناتيجەسىندە، بالالارعا تۋعاننان باستاپ ماماندىق العانعا دەيىنگى پسيحولوگيالىق-پەداگوگيكالىق سۇيەمەلدەۋدىڭ ءۇش دەڭگەيلى مودەلى ەنگىزىلدى. قولداۋ كابينەتتەرىنە جاڭا تالاپتار بەلگىلەندى، ەرەكشە ءبىلىم بەرۋ قاجەتتىلىكتەرى بار بالالارمەن جۇمىس ىستەۋدىڭ جەكە باعدارلامالارى ازىرلەندى، پەداگوگ-اسسيستەنت، ارنايى پەداگوگ جانە جەكە كومەكشى سياقتى جاڭا لاۋازىمدار ەنگىزىلدى.
2024 جىلدىڭ دەرەكتەرى بويىنشا قازاقستاندا ەرەكشە ءبىلىم بەرۋ قاجەتتىلىكتەرى بار بالالاردىڭ سانى 230 مىڭنان استى.