رەسپۋبليكالىق فيزيكا-ماتەماتيكا مەكتەبى (رفمم) ورتا ازيادا Apple Authorized Training Center for Education (AATCE) مارتەبەسىن العان العاشقى ءبىلىم ورداسى اتاندى، دەپ حابارلايدى aqshamnews.kz.
بۇل تۋرالى قازاقستان رەسپۋبليكاسى وقۋ-اعارتۋ مينيسترلىگىنىڭ باسپا ءسوز قىزمەتى حابارلايدى. AATCE مارتەبەسى مەكتەپتىڭ سيفرلىق پاندەردى وقىتۋ جانە IT ماماندارىن دايارلاۋ سالاسىنداعى Apple كومپانياسىنىڭ حالىقارالىق ستاندارتتارىنا سايكەستىگىن راستايدى. وقۋ باعدارلاماسى مەكتەپ وقۋشىلارى ءۇشىن ارنايى ازىرلەنىپ، «Develop in Swift» سەرتيفيكاتتالعان كۋرسىن قامتيدى، بۇل وقۋشىلارعا مەكتەپ اياسىندا Swift ءتىلىن مەڭگەرۋگە جانە iOS ءۇشىن ءموبيلدى قوسىمشالارىن ازىرلەۋگە مۇمكىندىك بەرەدى.
«وسى ۋاقىتقا دەيىن مۇنداي ورتالىقتار نەگىزىنەن ەۋروپا مەن سولتۇستىك امەريكا ەلدەرىندەگى ۋنيۆەرسيتەتتەردە اشىلدى. رفمم وقۋشىلارىنىڭ وقىتۋ مەن تەحنولوگيالىق دايارلىعىنىڭ جوعارى دەڭگەيى Apple مويىنداعان ءبىلىم بەرۋ دەڭگەيىنىڭ بىرەگەي ۇلگىسى بولدى»، — دەپ اتاپ ءوتتى iTeacher Academy (Apple Authorized Reseller) نەگىزىن قالاۋشى يۋليا اندرەيەۆا.
8-9 سىنىپ وقۋشىلارىنا ارنالعان ساباقتار اپتاسىنا ەكى رەت وتەدى. كۋرس بارىسىندا وقۋشىلار باعدارلامالاۋدىڭ نەگىزدەرىن، ءموبيلدى قوسىمشالاردىڭ قۇرىلىمىن ۇيرەنىپ، وزدەرىنىڭ IT-جوبالارىن جاسايدى. سونداي-اق، ولار Swift Student Challenge سياقتى حالىقارالىق Apple بايقاۋلارىنا قاتىسۋ مۇمكىندىگىن الادى. باستاۋىش سىنىپ وقۋشىلارىنا Apple ەكوجۇيەسىمەن تانىسۋ جانە نەگىزگى سيفرلىق داعدىلاردى مەڭگەرۋگە ارنالعان كۋرستار ۇيىمداستىرىلعان.
«قازاقستاندا AATCE ورتالىعىنىڭ اشىلۋى – سيفرلىق ءبىلىم بەرۋدى دامىتۋداعى ماڭىزدى قادام. ول وقۋشىلارىمىزدىڭ الەمدىك ۇزدىك ءبىلىم بەرۋ ستاندارتتارىنا قول جەتكىزۋىنە جول اشا وتىرىپ، وڭىرلىك دەڭگەيدە IT دايىندىعى سالاسىنداعى كوشباسشىلىقتى نىعايتۋعا سەرپىن بەرەدى»، — دەپ اتاپ ءوتتى ق ر وقۋ-اعارتۋ مينيسترلىگىنىڭ رەسمي وكىلى مەرەكە امانگەلدى قىزى.
ايتا كەتەيىك، سوڭعى جىلدارى قازاقستان مەكتەپتەرىندە ءبىلىم بەرۋ جۇيەسىن سيفرلاندىرۋ باعىتىندا جۇيەلى جۇمىستار اتقارىلۋدا. ۇلتتىق باستامالار اياسىندا مەكتەپ وقۋلىقتارىنىڭ 100%-ى سيفرلىق فورماتقا اۋىستىرىلدى، مەكتەپتەردىڭ 95،2%-دا ينتەرنەتكە قولجەتىمدىلىك ساپاسى ايتارلىقتاي جاقسارتىلدى، سيفرلىق ءبىلىم بەرۋ پلاتفورمالارى ەنگىزىلۋدە، وقۋ پروسەسىنە جاساندى ينتەللەكت ەلەمەنتتەرى ينتەگراسيالانۋدا. بۇل شارالار ءبىلىم ساپاسىن ارتتىرۋ جانە وقۋشىلاردى سيفرلىق بولاشاقتىڭ سىن-تەگەۋرىندەرىنە دايىنداۋعا باعىتتالعان.