الماتىداعى №2 ارنايى مەكتەپ-ينتەرناتىندا تۇلەكتەردىڭ بولاشاق ماماندىعىن تاڭداۋعا كومەكتەسۋگە ارنالعان «جارقىن بولاشاق باسپالداعى» اتتى كەزدەسۋ كەشى ءوتتى. بۇل ءبىلىم ورداسىندا قازىرگى تاڭدا 168 ەرەكشە بالا وقىپ جاتسا، ولاردىڭ ىشىندە بيىل 9-سىنىپتى اياقتايتىندار دا بار.
مەكتەپ-ينتەرناتتا ءبىلىم بەرۋ 1-10 سىنىپ ارالىعىندا جۇرەدى. وقۋشىلار 10-سىنىپتى قوسىمشا باعدار رەتىندە وقيتىندىقتان، تۇلەكتەر الدىندا ماڭىزدى قادام – ماماندىق تاڭداۋ ماسەلەسى تۇر. وسىعان وراي، مەكەمە باسشىلىعى جىل سايىن قالاداعى كاسىپتىك جانە تەحنيكالىق ءبىلىم بەرەتىن كوللەدج وكىلدەرىمەن كەزدەسۋ ۇيىمداستىرىپ، وقۋشىلارعا باعىت-باعدار بەرۋدى داستۇرگە اينالدىرعان.
بيىلعى كەزدەسۋدە كوللەدج وكىلدەرى ەرەكشە بالالارعا ارنالعان جۇمىسشى ماماندىقتارىن تانىستىرىپ، بەينەروليكتەر ارقىلى كاسىپتىك ءبىلىمنىڭ ارتىقشىلىقتارىن كورسەتتى. كاسىپتىك ءبىلىم بەرۋ مەكەمەلەرىنىڭ كوبى «جاس مامان» باعدارلاماسى اياسىندا تولىقتاي جاڭارتىلعان. ولاردىڭ ماتەريالدىق-تەحنيكالىق بازالارى زاماناۋي قۇرالدارمەن جابدىقتالعان، وقۋ شەبەرحانالارى مەن زەرتحانالارى تالاپقا ساي جاساقتالعان. وقۋشىلارعا تاجىريبەلى ۇستازدار مەن ءوندىرىس ماماندارى ءدارىس بەرەدى، بۇل ولارعا ساپالى ءبىلىم الىپ، بولاشاقتا ءوز قالاعان كاسىبىن يگەرۋىنە مۇمكىندىك بەرەدى.
كەزدەسۋگە اتا-انالار دا قاتىسىپ، بالالارىنىڭ ماماندىق تاڭداۋداعى مۇمكىندىكتەرى تۋرالى مامانداردان كەڭەس الدى. مۇنداي شارالار ەرەكشە بالالاردىڭ ءوز جولىن دۇرىس تاڭداۋىنا كومەكتەسىپ، بولاشاققا دەگەن سەنىمىن ارتتىرادى.