بيىل «جۇمىسشى ماماندىقتار جىلى» بولىپ جاريالاندى. بۇل – ەلىمىزدەگى ەڭبەك نارىعىن دامىتۋعا، سۇرانىسقا يە ماماندىقتاردى دارىپتەۋگە جانە جاستاردى جۇمىسپەن قامتۋعا باعىتتالعان ماڭىزدى قادام. وسىعان وراي، ەلىمىزدىڭ ءار ايماعىندا ءتۇرلى ءىس-شارالار ۇيىمداستىرىلىپ جاتىر.
ءبىزدىڭ باستامامىزدى الماتى قالاسىنىڭ ءبىلىم جانە جۇمىسپەن قامتۋ باسقارمالارى قولداپ، پرينتمەديا تەحنولوگيالار كوللەدجىمەن بىرلەسىپ، 40 جۇمىس بەرۋشىنى شاقىردىق. ولار 108 بوس جۇمىس ورنىن، جالپى 538 ۆاكانسيانى ۇسىنىپ وتىر. بۇل – جاستار ءۇشىن، اسىرەسە بيىل وقۋىن اياقتاعان تۇلەكتەر ءۇشىن ۇلكەن مۇمكىندىك.
قازىرگى تاڭدا مەديسينا مەن ءبىلىم بەرۋ – ەڭ تاپشى ماماندىقتاردىڭ قاتارىندا. سول سەبەپتى، وسى سالالارعا ەرەكشە نازار اۋدارىپ وتىرمىز. بۇگىنگى جارمەڭكەدە ءوندىرىس، قىزمەت كورسەتۋ، مەديسينا جانە ءبىلىم بەرۋ سالالارى بويىنشا كوپتەگەن جۇمىس ۇسىنىلدى. بۇل جارمەڭكە العاش رەت ۇيىمداستىرىلعانىمەن، ءبىز مۇنداي كەزدەسۋلەردى تۇراقتى تۇردە وتكىزۋدى جوسپارلاپ وتىرمىز.
الداعى ۋاقىتتا اشىق ەسىك كۇندەرىن ۇيىمداستىرىپ، جوعارى وقۋ ورىندارى مەن كوللەدجدەردە كەزدەسۋلەر وتكىزۋدى كوزدەپ وتىرمىز. بۇل ارقىلى ستۋدەنتتەر مەن تۇلەكتەر جۇمىس بەرۋشىلەرمەن تىكەلەي تانىسىپ، ەڭبەك نارىعىنداعى سۇرانىستاردى جاقسى تۇسىنە الادى.