وقۋشىلار سارايىندا قالالىق ءبىلىم باسقارماسىنىڭ ۇيىمداستىرۋىمەن مەكتەپ باسشىلارىنىڭ قاتىسۋىمەن كەڭەيتىلگەن جيىن ءوتتى. جيىن بارىسىندا ينكليۋزيۆتى ءبىلىم بەرۋ جانە قۇقىقبۇزۋشىلىقتىڭ الدىن الۋ سياقتى وزەكتى ماسەلەلەر كەڭىنەن ءسوز بولىپ، باسقا دا ماسەلەلەر تالقىلاندى.
كەزدەسۋدە ەرەكشە ءبىلىم بەرۋ قاجەتتىلىكتەرى (ەبق) بار بالالارعا ارنالعان ينكليۋزيۆتى ءبىلىم بەرۋدى دامىتۋ جانە وسى سالاداعى مونيتورينگ ناتيجەلەرى نەگىزگى تاقىرىپ بولدى. العاشقى ءسوز كەزەگىن قالالىق ءبىلىم باسقارماسىنىڭ باسشىسى سايران سايفەدەنوۆ الىپ، جيىننىڭ ماڭىزدىلىعىنا توقتادى.
– مەملەكەتىمىز ەرەكشە ءبىلىم بەرۋدى قاجەت ەتەتىن بالالالارعا بارىنشا قولداۋ كورسەتىپ وتىر. ارنايى وقۋ باعدارلامالارى ازىرلەندى. بۇل – اتا-اناعا زور كومەك قانا ەمەس، ەرەكشە بالانىڭ ەمدەلىپ، قاجەتتى داعدىلاردى يگەرۋىنە ىقپالىن تيگىزەدى. سونىمەن قاتار، مۇعالىمنەن باسقا بالانىڭ وقۋ ماتەريالىن يگەرۋگە كومەكتەسەتىن، پسيحولوگيالىق جانە الەۋمەتتىك ماسەلەلەردى شەشەتىن كومەكشىسى بولادى. بۇل شارالار مۇمكىندىگى شەكتەۋلى بالالارعا وزدەرىن قوعامنىڭ تولىققاندى قاتىسۋشىلارى رەتىندە سەزىنۋگە، دامۋعا جانە اينالاسىنداعىلارعا پايدالى بولۋعا مۇمكىندىك بەرەدى. ينكليۋزيۆتى ءبىلىم بەرۋدى دامىتۋ – مۇمكىندىگى شەكتەۋلى بالالارعا عانا ەمەس، بۇكىل ءبىلىم بەرۋ جۇيەسىنە ارنالعان ءبىلىم بەرۋدى دامىتۋ. بۇل بارلىعىنا تەڭ قۇقىقتا جانە تەڭ جاعدايدا ءبىلىم الۋعا مۇمكىندىك بەرەدى. سوندىقتان، ەرەكشەلىگى بار بالالاردى قوعامنان بولەكتەمەي، قولدان كەلگەنشە قولداعان دۇرىس، - دەدى باسقارما باسشىسى.
سونداي-اق وقۋشىلار اراسىنداعى قۇقىقبۇزۋشىلىقتىڭ الدىن الۋ شارالارى، مەكتەپتەردىڭ قاۋىپسىزدىگىن قامتاماسىز ەتۋ جانە تاربيە جۇمىسىن جەتىلدىرۋ ماسەلەلەرى دە جان-جاقتى ءسوز بولدى.
– قازىرگى تاڭدا قالا اكىمى ەربولات دوسايەۆتىڭ قولداۋىمەن، ينكليۋزيۆتى قالا قاعيداتتارىن ەنگىزۋ اياسىندا، مەملەكەتتىك جانە جەكەمەنشىك ءبىلىم بەرۋ مەكەمەلەرىندە بارلىق وقۋشىلارعا تەڭ مۇمكىندىك جاساۋ ءۇشىن قاجەتتى جاعدايلار جاسالىپ جاتىر. ءبىز ءاربىر بالانى نازاردان تىس قالدىرماۋىمىز كەرەك. مەكتەپ – بالالاردىڭ ەكىنشى ءۇيى. ولار جايلى جانە ءقاۋىپسىز ورتادا ءبىلىم الىپ، دامۋى قاجەت، – دەدى سايران سايفەدەنوۆ.
كەزدەسۋ قورىتىندىسى بويىنشا ەرەكشە ءبىلىم بەرۋ قاجەتتىلىكتەرى بار بالالارعا قولايلى وقۋ جاعدايلارىن جاساۋ، كامەلەتكە تولماعاندار اراسىنداعى قۇقىقبۇزۋشىلىقتىڭ الدىن الۋ شارالارىن كۇشەيتۋ جانە ءبىلىم بەرۋ سالاسىنداعى قارجىلىق ءتارتىپتى قامتاماسىز ەتۋ جونىندە ناقتى ۇسىنىستار ازىرلەندى.
سونداي-اق كەڭەس جۇمىسىنا قالالىق پوليسيا دەپارتامەنتىنىڭ يۋۆەنالدى پوليسيا وكىلدەرى جانە باسقا دا مۇددەلى قۇرىلىمدار قاتىستى. قاتىسۋشىلار ينكليۋزيۆتى ءبىلىم بەرۋدىڭ ينفراقۇرىلىمدىق، ادىستەمەلىك جانە كادرلىق ماسەلەلەرى دە جان-جاقتى تالقىلاندى.