ەردوعان توقايەۆقا جەر سىلكىنىسى سالدارىن جويۋ كەزىندە كورسەتكەن كومەگى ءۇشىن العىس ايتتى

قازاقستان حالقىنا اماندىق پەن باق-بەرەكە تىلەدى

مەملەكەت باسشىسى قاسىم-جومارت توقايەۆتىڭ اتىنا تۇركيا پرەزيدەنتى رەجەپ تاييپ ەردوعاننىڭ العىس حاتى كەلىپ ءتۇستى، دەپ حابارلايدى Almaty-akshamy.kz.

تۇركيا پرەزيدەنتى رەجەپ تاييپ ەردوعان ءوزىنىڭ حاتىندا تۇركيانىڭ  قاحرامانماراش پروۆينسياسى مەن باسقا دا ەلدى مەكەندەرىنە وراسان زور زاردابىن تيگىزگەن جويقىن جەر سىلكىنىسىنە بايلانىستى باۋىرلاس ەلدىڭ قايعىسىنا ورتاقتاسىپ، كوڭىل ايتقانى، سونداي-اق جەدەل كومەك كورسەتكەنى ءۇشىن مەملەكەت باسشىسى قاسىم-جومارت توقايەۆقا تۇركيا حالقىنىڭ  جانە جەكە ءوزىنىڭ اتىنان العىس ايتقان.

"وسىنداي تابيعي اپات كەزىندە دوستاس ەلدەردىڭ جانىمىزدان تابىلۋى قيىندىققا قارسى تۇرۋعا كۇش بەرەدى. قازاقستاننىڭ بەرگەن جاردەمى جەر سىلكىنىسىنىڭ اۋىر سالدارىمەن كۇرەس كەزىندە حالقىمىزعا زور قولداۋ بولدى. ەلىڭىزدىڭ ىزدەستىرۋ-قۇتقارۋ توبى ءۇيىندى استىندا قالعان ادامداردى امان ساقتاپ قالۋ ءۇشىن ايانباي ەڭبەك ەتىپ، ەرىك-جىگەر تانىتقانىن ءاردايىم ريزاشىلىقپەن ەسكە الامىز"، – دەپ جازىلعان العىس حاتتا.

سونىمەن قاتار رەجەپ تاييپ ەردوعان قاسىم-جومارت توقايەۆقا جانە  دوستاس ءارى باۋىرلاس قازاقستان حالقىنا اماندىق پەن باق-بەرەكە تىلەدى.

6 اقپاندا تۇركيا مەن سيريادا ون مىڭداعان ازاماتتاردىڭ ءومىرىن قيعان قاتتى ءزىلزالا بولدى.

سول كۇنى قازاقستان پرەزيدەنتى قاسىم-جومارت توقايەۆ ۇكىمەتكە تۇركياعا شۇعىل كومەك كورسەتۋدى تاپسىردى. قازاقستاندىق قۇتقارۋشىلار مەن دارىگەرلەر زارداپ شەككەن ايماقتارعا اتتاندى.