الماتىدا قۇرىلىستىڭ توبەسىنە شىققان جاسوسپىرىمدەر پوليسياعا جەتكىزىلدى

ولاردىڭ اتا-اناسى دا شاقىرىلدى

الماتىدا قۇرىلىسى اياقتالماعان عيماراتتىڭ ۇستىنە شىعىپ وتىرعان ەكى ءجاسوسپىرىم انىقتالىپ، اتا-اناسىمەن بىرگە پوليسيا باسقارماسىنا جەتكىزىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

الماتىدا اباي جانە تىلەندييەۆ كوشەلەرى قيىلىسىنداعى قۇرىلىسى اياقتالماعان بيىك عيماراتتىڭ ۇستىندە الاڭسىز وتىرعان ەكى ءجاسوسپىرىمنىڭ ۆيدەوسى ينتەرنەتتە تارادى.

جەلى قولدانۋشىلارى ۆيدەو استىنا «اتا-انالارى قايدا قاراپ وتىر؟»، «بۇل عيماراتتىڭ وسىلاي قاراۋسىز، سالىنباي تۇرعانىنا قانشا جىل بولدى، ونى ءبىرجاقتى ەتەتىن مەزگىل جەتتى»، «جاستار سەلفي جاساپ جاتىر»، «وتكەن جىلى بۇل جەردەن جاس ادام سەكىرىپ كەتىپ، قازا تاپتى» دەگەن پىكىرلەر قالدىردى.

الماتى قالالىق پوليسيا دەپارتامەنتى جاسوسپىرىمدەردى انىقتاپ، پوليسيا باسقارماسىنا جەتكىزگەنىن حابارلادى.

«يۋۆەنالدى پوليسيا ءبولىمىنىڭ ينسپەكتورلارى جاسوسپىرىمدەردىڭ كىم ەكەنىن انىقتاپ، ولاردى المالى اۋدانىنىڭ پوليسيا باسقارماسىنا اپاردى. ولاردىڭ اتا-اناسى دا شاقىرىلدى. ولارعا قۇقىقتىق ءتۇسىندىرۋ جۇمىستارى جۇرگىزىلدى»، - دەپ حابارلادى پوليسيا.

ەسكە سالايىق، ق ر يندۋستريا جانە ينفراقۇرىلىمدىق دامۋ مينيسترلىگى الداعى التى جىلدا 50 پروبلەمالىق تۇرعىن ءۇيدىڭ قۇرىلىسى اياقتالىپ، وڭىرلەردە 1 500 اپاتتى جانە توزىعى جەتكەن ۇيلەردى بۇزۋ، 40 مىڭ مەنشىك يەسىنىڭ تۇرعىن ءۇي ماسەلەلەرىن شەشۋ جونىندەگى وڭىرلىك باعدارلامالار قابىلداناتىنىن مالىمدەگەن بولاتىن.