الماتى اكىمى ەربولات دوسايەۆ جۇمىس ساپارى اياسىندا ەسەنتاي وزەنى ارقىلى وتەتىن كوپىردى قايتا جاڭارتۋ بارىسىمەن تانىستى، دەپ حابارلايدى almaty-akshamy.kz
كوپىردى تەكسەرۋ كەزىندە اكىمگە ونى كۇشەيتۋ جۇمىستارى تۋرالى باياندالدى. 2020 جىلى قۇرىلىمنىڭ جاعدايى اپاتقا دەيىنگى دەپ تانىلدى. ساراپتامالىق زەرتتەۋ ناتيجەسىندە انىقتالعان اقاۋلار كوپىردىڭ جۇك كوتەرگىشتىگى مەن قاۋىپسىزدىگىنە اسەر ەتتى. جوندەۋ جۇمىستارى شەڭبەرىندە ريگەل كۇشەيتىلەدى، ارالىق قۇرىلىستىڭ پليتالارى جاڭارتىلادى، 96 ارقالىق اۋىستىرىلادى، سونداي-اق اسفالتبەتون جابىنى سالىنادى. قايتا قۇرۋ جۇمىستارى ءۇش كەزەڭنەن تۇرادى. بۇگىنگى تاڭدا جۇمىستىڭ ەكىنشى كەزەڭى جۇرگىزىلۋدە. كوپىردەگى قوزعالىس كەزەڭ-كەزەڭىمەن اشىلادى: بۇگىندە ۋچاسكەنىڭ وڭتۇستىك جاعىنداعى كوپىردە جۇمىس جۇرگىزىلىپ، قوزعالىس اشىق.
كۇزدە كەزەكتى وقۋ جىلى باستالىپ، كولىك اعىنى ۇلعاياتىنىن ەسكەرسەك، مەگاپوليس باسشىسىنىڭ تاپسىرماسى بويىنشا قۇرىلىس بريگادالارى ەكى اۋىسىمدا جۇمىس ىستەيدى. بۇل كولىك كوپىرىن جوندەۋ جۇمىستارىن تامىز ايىنىڭ سوڭىنا دەيىن، ياعني نورماتيۆتىك مەرزىمنەن 2 ەسە ەرتە اياقتاۋعا مۇمكىندىك بەرەدى. ەستەرىڭىزگە سالا كەتەيىك، كوپىردى جوندەۋ 6 ماۋسىمدا باستالعان بولاتىن. وسىلايشا، 6-7 ايدىڭ ورنىنا قايتا قۇرۋ مەرزىمى 3 ايدى قۇرايدى. بۇل رەتتە قۇرىلىس نورمالارى مەن قاۋىپسىزدىك قاعيدالارى تولىق ساقتالعان كەزدە جۇمىستار جۇرگىزىلەدى.
قايتا قۇرۋدىڭ ماڭىزدى ناتيجەسى كولىك جولاقتارىنىڭ سانىن اعىمداعى 6-دان 8-گە دەيىن ۇلعايتۋ ارقىلى كوپىردىڭ كەڭەيۋى بولادى، ياعني ءار باعىتتا 4 جولاق. بۇل ۆەلو-جاياۋ جۇرگىنشىلەر كوپىرىن نەگىزگى كولىكتەن بولەك قۇرىلىستارعا اۋىستىرۋدىڭ ارقاسىندا مۇمكىن بولدى. ەربولات دوسايەۆ ەرەكشە قاجەتتىلىكتەرى بار ادامدار ءۇشىن پاندۋستاردى ورناتۋدىڭ ماڭىزدىلىعىنا جاۋاپتى ورىنداۋشىلاردىڭ نازارىن اۋداردى.
تەكسەرۋ قورىتىندىسى بويىنشا مەگاپوليس اكىمى ەربولات دوسايەۆ كولىك كوپىرىن 1 قىركۇيەكتەن باستاپ ىسكە قوسۋدى تاپسىردى. جاياۋ جۇرگىنشىلەر كوپىرلەرىن سالۋ جۇمىستارى قازان ايىنىڭ ورتاسىنا دەيىن اياقتالادى. سونىمەن قاتار، قالا باسشىسى كەلەسى جىلدىڭ اقپان ايىنا دەيىن قالا تۇرعىندارىنىڭ جايلىلىعى ءۇشىن ىرگەلەس اۋماقتى اباتتاندىرۋ بويىنشا ءبىرقاتار تاپسىرمالار بەردى.