بۇگىن الماتى اكىمى ەربولات دوسايەۆ جۇمىس ساپارىمەن ناۋرىزباي اۋدانىنا بارىپ، «اقجار» شاعىن اۋدانىنداعى № 200 مەكتەپ-گيمنازيانىڭ مىسالىندا الداعى وقۋ جىلىنا دايىندىقپەن تانىستى.
مەكتەپ عيماراتىندا جازعى دەمالىس كەزىندە اعىمداعى جوندەۋ جۇمىستارى اياقتالدى، دەپ حابارلايدى Almaty-akshamy.kz.
اتقارىلعان جۇمىستىڭ باستى ناتيجەسى كىتاپحانانى مولەرنيزاسيالاۋ بولدى. ەربولات دوسايەۆ كىتاپحانانى ارالاپ كوردى ءارى الماتىلىق وقۋشىلار ءۇشىن 1 قىركۇيەكتەن باستاپ جۇمىس جاسايتىن Kitap.kz ونلاين پلاتفورماسىنىڭ قولجەتىمدىلىگىن تەكسەردى. جاڭا ۇلگىدەگى كىتاپحانادا كىتاپ قورىن كەڭەيتۋدەن جانە تەحنيكالىق جاراقتاندىرۋدان باسقا وقۋشىلاردىڭ شىعارماشىلىق دامۋى ءۇشىن ىڭعايلى الاڭدار قۇرىلدى. ايتا كەتەرلىگى، الماتىنىڭ 200-دەن استام مەملەكەتتىك مەكتەبىندە جاڭا فورماتتاعى كىتاپحانالار جۇمىس ىستەيدى. جوندەۋ جۇمىستارىن جۇرگىزۋ بارىسىندا بارلىعى 100% قامتىلادى.
«مەكتەپ جاڭا وقۋ جىلىنا تولىق دايىن. بارلىق وقۋشىلار وقۋلىقتارمەن قامتاماسىز ەتىلگەن. بالالاردى قابىلداۋعا 66 وقۋ سىنىبى، 150 ورىندىق زاماناۋي اسحانا جانە 2 سپورت زالى، زەرتحانالىق كابينەتتەر ازىرلەندى. مەكتەپتە بارلىعى 2200 بالا وقيدى. عيمارات ىشىندەگى جانە ىرگەلەس اۋماقتىڭ پەريمەترى بويىنشا قاۋىپسىزدىك ءۇشىن 47 بەينەباقىلاۋ كامەراسى جۇمىس ىستەيدى»، - دەدى مەكتەپ-گيمنازيا ديرەكتورى اينۇر نۇرىم قىزى. مەكتەپتە ينكليۋزيۆتى ءبىلىم بەرۋ قاراستىرىلعان، پسيحولوگيالىق-پەداگوگيكالىق سۇيەمەلدەۋ كابينەتى اشىلدى. ەرەكشە ءبىلىم بەرۋ قاجەتتىلىكتەرى بار بالالارمەن پەداگوگ-پسيحولوگ، ارنايى پەداگوگ، لوگوپەد-مۇعالىم جانە 4 - پەداگوگ اسسيستەنت ماماندارى جۇمىس ىستەيدى. مۇمكىندىگى شەكتەۋلى وقۋشىلار ءۇشىن ليفت قاراستىرىلعان.
ءوز كەزەگىندە، ءبىلىم باسقارماسىنىڭ باسشىسى ءلاززات جىلقىبايەۆا الداعى وقۋ جىلىنا دايىندىق 95% -دى قۇرايتىنىن، ءبىرقاتار مەكتەپ عيماراتتارىندا سەيسميكالىق كۇشەيتۋ جۇمىستارى اياقتالاتىنىن ايتتى. جۇمىستار كەستەگە سايكەس جۇرۋدە. تامىز ايىنىڭ سوڭىنا قاراي 100% دايىندىق قامتاماسىز ەتىلەدى.
مەگاپوليس اكىمى اكت زالى مەن اسحانالارعا بارىپ، مەكتەپ باسشىلىعىنىڭ بالالاردىڭ ساپالى جانە تەڭگەرىمدى تاماقتانۋىنىڭ ماڭىزدىلىعىنا نازارىن اۋداردى. ەسكە سالساق، مەملەكەت باسشىسىنىڭ تاپسىرماسىن ورىنداۋ اياسىندا الماتىدا 1-4 سىنىپ وقۋشىلارى، سونداي-اق از قامتىلعان وتباسىلاردان شىققان بارلىق وقۋشىلار وقۋ سىنىبىنا قاراماستان تەگىن تاماقپەن قامتاماسىز ەتىلگەن.
مەكتەپتى ارالاعان ەربولات دوسايەۆ جۇمىس ساپارىنىڭ قورىتىندىسى بويىنشا بالالاردى وقىتۋ ءۇشىن بارىنشا جايلى جاعداي جاساۋعا قاتىستى جۇمىستى جالعاستىرۋدى تاپسىردى، سونداي-اق قاۋىپسىزدىكتى قامتاماسىز ەتۋ ءۇشىن باقىلاۋدى كۇشەيتۋ، ونىڭ ىشىندە تۋرنيكەتتەر جۇيەسىن ەنگىزۋ جونىندە ءبىرقاتار تاپسىرمالار بەردى.