ەرەكشە قاجەتتىلىكتەرى بار ادامداردى الەۋمەتتىك قولداۋ – الماتى اكىمدىگىنىڭ باسىم مىندەتتەرىنىڭ ءبىرى.
بۇل تۋرالى قالا باسشىسى ەربولات دوسايەۆ ينكليۋزيۆتى ورتانى دامىتۋ جونىندەگى كەڭەستىڭ ءبىرىنشى وتىرىسىندا مالىمدەدى، دەپ حابارلايدى Almaty-akshamy.kz.
«بۇگىندە الماتىدا ەرەكشە قاجەتتىلىكتەرى بار 58 مىڭنان استام ادام تۇرادى، ونىڭ 9 مىڭى – ءبىزدىڭ بالالارىمىز. ءاربىر ازامات ەركىن دامۋعا، وقۋعا، جۇمىس ىستەۋگە جانە ءبىزدىڭ سۇيىكتى قالامىزدىڭ دامۋىنا ءوز ۇلەسىن قوسۋعا مۇمكىندىك الا وتىرىپ، ءوزىن قوعامنىڭ تولىققاندى مۇشەسى رەتىندە سەزىنۋى ماڭىزدى»، - دەپ اتاپ ءوتتى مەگاپوليس باسشىسى.
مۇنداي ينكليۋزيۆتى ورتانى قۇرۋ اكىمدىك پەن ازاماتتىق قوعامنىڭ بىرلەسكەن كۇش-جىگەرىن تالاپ ەتەدى. ەربولات دوسايەۆتىڭ ايتۋىنشا، باسىم ماقساتتاردىڭ ءبىرى – الماتىنى ينكليۋزيۆتى، تەڭ مۇمكىندىكتەر قالاسى ەتۋ. وتكەن جىلدان باستاپ وسى باعىتتا بەلسەندى قادامدار جاسالۋدا.
ەسكە سالساق، بيۋروكراتسىزداندىرۋ شارالارىن ىسكە اسىرۋ اياسىندا مۇگەدەكتىگى بار ادامدار ماسەلەلەرى بويىنشا ەكى كونسۋلتاتيۆتىك-كەڭەسشى ورگاننىڭ قىزمەتىن قايتا فورماتتاۋ جانە الماتى قالاسىنىڭ ينكليۋزيۆتى ورتاسىن دامىتۋ جونىندەگى كەڭەس قۇرۋ تۋرالى شەشىم قابىلداندى.
كەڭەس ءتوراعاسى - الماتى قالاسىنىڭ اكىمى ەربولات دوسايەۆ، ءتوراعانىڭ ورىنباسارلارى – اكىمنىڭ ورىنباسارى اسەم ءنۇسىپوۆا جانە اكىمنىڭ شتاتتان تىس كەڭەسشىسى قاسيەت وماروۆا بولدى. سونداي-اق، كەڭەس قۇرامىنا مۇمكىندىگى شەكتەۋلى جانداردىڭ قۇقىقتارىن قورعاۋ سالاسىنداعى بەلگىلى قوعام قايراتكەرلەرى بوگدان دجەپكا، تاتيانا باكلاجانسكايا، مايرا سۇلەيەۆا، ءاسيا احتانوۆا، راۋانا ساعادييەۆا جانە باسقالار ەندى.
2023 جىلدان باستاپ اكىمدىك جانىنان قالا اكىمىنىڭ ينكليۋزيا جونىندەگى شتاتتان تىس كەڭەسشى ينستيتۋتى ءساتتى ەنگىزىلدى، كەڭەسشىنىڭ كەڭسەسى جۇمىس ىستەيدى، وندا قالانى باسقارۋدىڭ بارلىق اسپەكتىلەرىنە ينكليۋزيۆتى قاعيداتتاردى ەنگىزۋ جونىندەگى كوماندا جۇمىس ىستەيدى.