بۇگىن قالالىق فيليالدىڭ كەزەكتەن تىس كونفەرەنسياسى ءوتتى.
جيىن بارىسىندا دەلەگاتتار Amanat پارتياسى فيليالىنىڭ جاڭا ءتوراعاسى ەتىپ الماتى قالاسىنىڭ اكىمى ەربولات دوسايەۆتى سايلادى، دەپ حابارلايدى Almaty-akshamy.kz
Amanat (بۇرىنعى Nur Otan) پارتياسىنىڭ اتقارۋشى حاتشىسى اسحات ورالوۆ الماتى قالاسىنا كەلگەن جۇمىس ساپارىندا قالالىق فيليالدىڭ كەزەكتەن تىس كونفەرەنسياسىنا قاتىسقان. وسى جيىندا دەلەگاتتار Amanat پارتياسى فيليالىنىڭ جاڭا ءتوراعالىعىنا الماتى قالاسىنىڭ اكىمى ەربولات دوسايەۆتى سايلادى.
پارتيانىڭ اتقارۋشى حاتشىسى فيليال جاڭا باسشىلىعىنىڭ الدىندا پارتيانى مودەرنيزاسيالاۋدى ەسكەرە وتىرىپ، جۇمىستى جانداندىرۋ جانە سايلاۋالدى مىندەتتەمەلەردىڭ ساپالى ورىندالۋىن باقىلاۋ مىندەتتەرى تۇرعانىن اتاپ ءوتتى.
«وزدەرىڭىز بىلەتىندەي، مەملەكەت باسشىسى، Amanat پارتياسىنىڭ ءتوراعاسى قاسىم-جومارت توقايەۆ حالىقپەن كەرى بايلانىس جاساۋدا ترانسپارەنتتىلىكتى ارتتىرىپ، قوعامنىڭ بارلىق وكىلدەرىمەن جۇمىستى كۇشەيتۋ بويىنشا مىندەتتەر قويدى. پارتيانىڭ بارلىق سايلاۋالدى ۋادەلەرىن – ازاماتتاردىڭ تالاپ-تىلەكتەرىن، «اماناتتارىن» ورىنداۋ نەگىزگى باسىمدىق بولىپ قالا بەرەدى. بۇل رەتتە ءبىز مەملەكەتتىك ورگانداردان سيفرلار تالاپ ەتەتىن تاجىريبەدەن الشاقتاۋىمىز كەرەك. ازاماتتاردىڭ پىكىرلەرىن ەسكەرە وتىرىپ، باعدارلامانىڭ تارماقتارىن ناقتى ىسكە اسىرۋعا ىقپال ەتەتىن پرواكتيۆتى فورماتقا اۋىسۋىمىز قاجەت»، - دەپ اتاپ ءوتتى اسحات ورالوۆ.