بۇل شارا دا «قۇس ۇياسى» دەپ اتالاتىن ۇلتتىق ستاديونىندا وتكىزىلدى.
جۇڭگو استاناسى بەيجىڭ قالاسىندا 2022 جىلعى XIII قىسقى پاراليمپيادا ويىندارى سالتاناتتى تۇردە اشىلدى، دەپ حابارلايدى Almaty-akshamy.kz
سالتاناتتى شارادا ەلىمىزدىڭ تۋىن پاراشاڭعىشى ەربول حاميتوۆ ۇستاپ شىقتى. ايتۋلى الاماندا قازاقستان اتىنان ەربول حاميتوۆ، الەكساندر گەرليس، دەنيس پەترەنكو، يۋريي بەرەزين جانە سەرگەي ۋسولسيەۆ پاراشاڭعى جانە پارابياتلون سپورت تۇرلەرىنەن ەل نامىسىن قورعايدى. سپورتشىلار شاڭعى جارىسى، بياتلون، تاۋ شاڭعىسى، سلەدج-حوككەي، ارباداعى كەرلينگ جانە سنوۋبورد سەكىلدى سپورتتىڭ التى تۇرىنەن 78 جۇلدەنى ساراپقا سالادى.
قازاقستان سپورتشىلارى پاراليمپيادا ويىندارىنا 1994 جىلدان بەرى تۇراقتى تۇردە قاتىسىپ كەلەدى. بۇگىنگى كۇنگە دەيىن ەل قورجىنىنا 1 التىن، 1 كۇمىس مەدال ءتۇستى. 1994 جىلى 10 شاقىرىمعا كلاسسيكالىق مانەردە شاڭعى جارىسىندا قازاقستاندىق ليۋبوۆ ۆوروبيەۆا كۇمىس السا، 2018 جىلى شاڭعىمەن جارىستا الەكساندر كوليادين 1،5 شاقىرىمعا كلاسسيكالىق مانەردە سپرينت جارىسىندا چەمپيون اتاندى. قىسقى پاراليمپيادا ويىندارى 13 ناۋرىزعا دەيىن بولادى.