الماتىدا ق ر پرەزيدەنتى قاسىم-جومارت توقايەۆتىڭ تاپسىرماسى بويىنشا مەگاپوليس تۇرعىندارىنا ورتالىقتاندىرىلعان سۋ بەرۋ ءۇشىن 4 جاڭا سۋ جيناعىشتى جوبالاۋ مەن سالۋ جۇمىستارى جۇرگىزىلۋدە.
الماتى اكىمى ەربولات دوسايەۆ مەملەكەت باسشىسىنىڭ قاتىسۋىمەن الماتى قالاسىن دامىتۋ جونىندەگى جيىندا اتاپ وتكەندەي، جوبالىق قۋاتى تاۋلىگىنە 15 مىڭ م3 بولاتىن، 50 مىڭ تۇرعىندى قامتيتىن «قارعالى» سۋ جيناعىش بويىنشا جۇمىستار 2020 جىلدىڭ ناۋرىز ايىندا باستالدى.
«مەردىگەرلىك كومپانيانىڭ جۇمىسىنا بايلانىستى اياقتاۋ مەرزىمى بىرنەشە رەت كەيىنگە قالدىرىلدى. وسى جىلدىڭ ماۋسىم ايىندا «قازقسعزي» اق-مەن بىرلەسىپ سالىنعان رەزەرۆۋارلاردى تولتىرۋ بويىنشا تەستىلىك سىناق وتكىزىلىپ، تەسىكتەر انىقتالدى. مەردىگەر ءقازىر اقاۋدى رەتتەپ جاتىر، جوبا كۇزدە اياقتالۋعا ءتيىس»، - دەدى ەربولات دوسايەۆ.
ناۋرىزباي اۋدانىنىڭ باتىس بولىگىنىڭ 100 مىڭ تۇرعىنىن قامتيتىن، جوبالىق قۋاتى تاۋلىگىنە 22 مىڭ م3 بولاتىن «اقساي» سۋ جيناعىشىنا كەلسەك، بۇل جۇمىستار 2022 جىلدىڭ تامىز ايىندا باستالدى. ءبىراق ماتەريالدار مەن قۇرال-جابدىقتىڭ قىمباتتاۋىنا بايلانىستى بۇگىندە جوبانىڭ جسق-عا تۇزەتۋلەر ەنگىزىلىپ جاتىر. بۇل جۇمىس 2023 جىلدىڭ 4 توقسانىندا قايتا جالعاستىرىپ، 2025 جىلدىڭ قىركۇيەگىندە اياقتالادى دەپ جوسپارلانعان.
«جوبالىق قۋاتى تاۋلىگىنە 9 مىڭ م3، 22 مىڭ تۇرعىندى قامتيتىن ەرمەنساي» سۋ جيناعىشتىڭ قازىرگى ۋاقىتتا قۇرىلىس الاڭىن اۋىستىرۋعا بايلانىستى جسق تۇزەتۋ اياقتالىپ كەلەدى. بۇل جوبانى 6،5 ملرد تەڭگەگە دەيىن ارزانداتۋعا مۇمكىندىك بەرەدى. قۇرىلىس 2024 جىلعى 2 توقسانىندا باستالادى. سۋ جيناعىشتى 2025 جىلدىڭ سوڭىنا دەيىن ىسكە قوسۋ جوسپارلانىپ وتىر»، - دەدى قالا باسشىسى.
ال قۋاتتىلىعى تاۋلىگىنە 43 مىڭ م3 «بارلىق» سۋ جيناعىش قوسىمشا 80 مىڭ تۇرعىندى قامتۋعا مۇمكىندىك بەرەدى. ول بويىنشا تەن ازىرلەۋ باستالدى، جوبا 2026 جىلى اياقتالادى دەپ جوسپارلانعان. سۋ جيناۋ 12 جاڭا ۇڭعىمانىڭ ارقاسىندا جەر استى كوزدەرىنەن سۋ جينايدى. اكىمنىڭ پىكىرىنشە، اتالعان نىسانداردىڭ ۋاقىتىلى اياقتالۋى الماتىنىڭ 250 مىڭ تۇرعىنىن ساپالى سۋمەن ۇزدىكسىز قامتاماسىز ەتۋگە جول اشادى.
