الماتىدا سۋمەن ۇزدىكسىز جابدىقتاۋ ماسەلەسى ناۋرىزباي اۋدانىنداعى اقجار مەن شۇعىلا شاعىن اۋدانى مەن مەدەۋ اۋدانىنىڭ جوعارعى بولىگىندەگى تۇرعىندار ءۇشىن وزەكتى بولىپ تابىلادى، دەپ حابارلايدى Almaty-akshamy.kz.
«بىلتىر كۇزدە تۇرعىنداردان كەلگەن كوپتەگەن ءوتىنىشتى ەسكەرىپ، «Qazaq stroy» جەكە ينۆەستورىن تارتىپ، بيىل ناۋرىز ايىنان باستاپ ماگيسترالدىق سۋ قۇبىرىن، سورعى ستانسياسىن جانە سۋ رەزەرۆۋارلارىن سالۋ جوباسى ازىرلەنىپ، ىسكە اسىرىلۋدا. ولاردىڭ بارلىعى بيىل 1 تامىزدا پايدالانۋعا بەرىلدى. اقجار جانە شۇعىلا شاعىن اۋداندارىنىڭ 35 مىڭ تۇرعىنى قامتىلدى»، - دەدى ەربولات دوسايەۆ مەملەكەت باسشىسىنىڭ قاتىسۋىمەن وتكەن الماتى قالاسىن دامىتۋ جونىندەگى كەڭەستە.
اكىمنىڭ ايتۋىنشا، مەدەۋ اۋدانىنىڭ كامەنسك ءۇستىرتى، كولساي، مۇزتاۋ جانە يۋبيلەينىي شاعىن اۋداندارى سۋمەن ۇزدىكسىز جابدىقتالعان جوق. بۇل ماسەلەنى شەشۋ ءۇشىن بيىل ناۋرىز ايىندا بالقاش سۋ جيناعىشىنداعى تج جەلىسى بويىنشا قۋاتتى تاۋلىگىنە 7،2 مىڭ م3 4 ۇڭعىما مەن 2 رەزەرۆۋاردىڭ قۇرىلىسى باستالدى، ول 2023 جىلدىڭ سوڭىنا دەيىن اياقتالادى. بۇل 20 مىڭ تۇرعىندى سۋمەن قامتۋعا مۇمكىندىك بەرەدى.
«جەر ءۇستى سۋ كوزدەرىنە تاۋەلدىلىكتى ايتارلىقتاي تومەندەتۋ ءۇشىن اكىمدىك قالانىڭ ءال-فارابي داڭعىلىنان جوعارعى بولىگىن 2023 جىلدىڭ سوڭىنا دەيىن سۋمەن ۇزدىكسىز قامتاماسىز ەتۋ ءۇشىن 3 سۋ جيناعىشتى جوبالاۋدى باستادى»، - دەدى ەربولات دوسايەۆ.