قالا دامۋى كەرەك.
الماتى قالاسى الاتاۋ اۋدانىنىڭ تۇرعىندارى شاھار باسشىسى ەربولات دوسايەۆپەن كەزدەسۋ بارىسىندا جاڭا تەمىرجول ۆوكزالىنىڭ قۇرىلىسىنا بايلانىستى سۇرىلەتىن ۇيلەر جايىندا سۇرادى، دەپ حابارلايدى Almaty-akshamy.kz.
«ارنايى ماقساتتاعى جەكە تۇرعىن ءۇي قۇرىلىسىنا ارنالعان مەملەكەتتىك اكتكە سايكەس جەر تەلىمدەرىن زاڭدى تۇردە ساتىپ الدىق، بۇل قۇجات 2014 جىلدىڭ باس جوسپارىنا جانە 2019 جىلدىڭ ەگجەي-تەگجەيلى جوسپارلاۋ جوبالارىنا سايكەس كەلەدى. الايدا، 2021 جىلدىڭ 31 جەلتوقسانىندا قالالىق جوسپارلاۋ جانە ۋربانيستيكا باسقارماسى بىزگە ۇيلەرىمىزدىڭ سۇرىلەتىنىن حابارلادى. سەبەبىن قىزىل سىزىقتا ورنالاسقان دەپ ءتۇسىندىردى»، - دەدى "مادەنيەت" شاعىناۋدانىنىڭ تۇرعىنى اكىمگە قويعان ساۋالىندا.
قالا باسشىسىنىڭ سوزىنە جۇگىنسەك، جوبا دايىن بولعاندا، ارنايى تالقىلاۋ بولادى.
«نەگىزگى قۇجات - «الماتى قالاسىنىڭ 2040 جىلعا دەيىنگى باس جوسپارى»، ول جىل سوڭىنا دەيىن قابىلدانادى. مەن بۇل بۇرىن قوسىلعان اۋماقتار ەكەنىن تۇسىنەمىن، ال ءسىز ول جەردى ساتىپ الدىڭىز. الايدا قالا دامۋى كەرەك. تۇرعىندار ءبىز گازبەن قامتاماسىز ەتە المايتىن، تەحنولوگيالىق تالاپتارعا ساي كەلمەيتىن جەرلەرگە ءۇي تۇرعىزعان. مەن باس جوسپار بويىنشا ەرەجەلەردى مۇمكىندىگىنشە ءتيىمدى قايتا قاراۋ تۋرالى تاپسىرما بەردىم. جوبا دايىن بولعان كەزدە، ءبىز ونى كورسەتەمىز، بىرگە تالقىلايمىز جانە شەشىم قابىلدايمىز»، - دەدى اكىم.
اكىمنىڭ ايتۋىنشا، قالا ءدال وسى اۋداندا قارقىندى دامىپ كەلەدى.
«ەگەر ۇيلەرىڭىز سۇرىلگەن جاعدايدا، نارىقتىق قۇنى بويىنشا وتەيمىز»، - دەدى ەربولات دوسايەۆ.