الماتىدا ورتالىقتاندىرىلعان كارىز جۇيەسىمەن قامتىلماعان المالى اۋدانىنىڭ 19 كوشەسىنە ينجەنەرلىك جەلىلەر سالىنادى
الماتى اكىمى ەربولات دوسايەۆ المالى اۋدانىنا جۇمىس ساپارى بارىسىندا تۇرعىندارمەن كەزدەسىپ، كارىز جەلىلەرىنىڭ قۇرىلىس بارىسىمەن تانىستى، دەپ حابارلايدى aqshamnews.kz
جوبا بويىنشا المالى اۋدانىنىڭ 19 كوشەسىندە جالپى ۇزىندىعى 15 كم بولاتىن كارىز جەلىلەرىن سالۋ كوزدەلگەن. بيىل 6 كوشەدە 3 كم جەلىنىڭ قۇرىلىسى اياقتالادى. سونىمەن قاتار، جەكە سەكتور سالىنا باستاعاننان بەرى ورتالىقتاندىرىلعان كارىز جۇيەسى بولماعان برۋنو كوشەسىندە قۇرىلىس جۇمىستارى اياقتالدى.
2025 جىلى قالعان 13 كوشەدە جوبانى جۇزەگە اسىرۋ جالعاسادى.
قابىلدانعان شارالاردىڭ ناتيجەسىندە 6800 تۇتىنۋشى ورتالىقتاندىرىلعان ينجەنەرلىك جەلىلەرمەن قامتاماسىز ەتىلەدى.
«تۇرعىندار اتىنان ءبىزدىڭ وتىنىشتەرىمىزگە نازار اۋدارىپ، اتقارىلعان جۇمىس ءۇشىن العىس ايتامىن. بىزدە ورتالىقتاندىرىلعان كارىز جۇيەسى پايدا بولدى، كوشە جارىعى ورناتىلدى، جۇمىستان كەيىن جول تولىق ەنىمەن اسفالتتالدى. بۇل وزگەرىستەرگە وتە ريزامىز، ەندى بىزدە جايلى ءارى ىڭعايلى بولدى. ءبىز قۋانا-قۋانا سەرۋەنگە شىعامىز. قولداۋلارىڭىز بەن قامقورلىقتارىڭىز ءۇشىن راحمەت»، - دەدى تۇرعىنداردىڭ ءبىرى.
ايتا كەتەيىك، 2024 جىلدىڭ ناۋرىزىندا قالا اكىمى ەربولات دوسايەۆتىڭ باستاماسىمەن الماتىدا ينجەنەرلىك كوممۋنيكاسيالاردى كۇتىپ ۇستاۋدىڭ جاڭا ەرەجەلەرى قابىلداندى. قۇجاتقا سايكەس، جەر استى ينجەنەرلىك جەلىلەردى توسەۋ كەزىندە جول جابىنىن اشۋ جانە كوشەلەردى قازۋ اسفالتبەتون جابىندىسىن تولىقتاي – جيەكتاستان جيەكتاسقا دەيىن قالپىنا كەلتىرۋ مىندەتتەمەسىمەن جۇرگىزىلۋى كەرەك.
قالا باسشىسى المالى اۋدانىنىڭ اكىمىنە قۇرىلىس ساپاسى مەن جىلدامدىعىن باقىلاپ، تۇتىنۋشىلاردى ورتالىقتاندىرىلعان كوممۋنيكاسيالارعا ۋاقىتىلى قوسۋدى تاپسىردى.
ەسكە سالا كەتەيىك، الماتىدا ينجەنەرلىك ينفراقۇرىلىمدى جاڭعىرتۋ قارقىندى جۇرگىزىلۋدە. بيىلعى 9 ايدا 219 كم جاڭا سۋمەن جابدىقتاۋ جانە سۋ بۇرۋ جەلىلەرى سالىندى، 27،3 كم قولدانىستاعى جەلىلەر جاڭارتىلدى. 2025 جىلى تاعى 240 كم جەلى سالۋ جانە 48 كم جەلىنى جاڭارتۋ جوسپارلانعان.
وسىلايشا، قابىلدانعان كەشەندى شارالاردىڭ ارقاسىندا 100 مىڭعا جۋىق قالا تۇرعىنى ءۇشىن ينجەنەرلىك جەلىلەردىڭ توزۋىنا بايلانىستى جىلدار بويى شەشىلمەگەن سۋمەن جابدىقتاۋ جانە سۋ بۇرۋ جەلىلەرى ماسەلەسى شەشىلەدى.