زاقىمدانۋ مەن كورروزيا: ەربولات دوسايەۆتىڭ تاپسىرماسىمەن الماتىدا 50 جىل بولعان گاز قۇبىرى اۋىستىرىلدى
بوستاندىق اۋدانىندا جاڭا گاز قۇبىرى سالىنعاننان كەيىن 3،5 مىڭنان استام الماتىلىق تۇراقتى گازبەن قامتاماسىز ەتىلەدى
الماتى اكىمى ەربولات دوسايەۆ جۇمىس ساپارى بارىسىندا بوستاندىق اۋدانىنداعى جاروكوۆ كوشەسىنەن بۇقار جىراۋ بۋلۆارى ارقىلى ەسەنتاي وزەنىنە دەيىنگى گازبەن جابدىقتاۋ جەلىلەرىن قايتا قۇرۋ جۇمىستارىمەن تانىستى. ورتاشا قىسىمدى، ۇزىندىعى 1766،9 مەتر بولاتىن جەر استى گاز قۇبىرى 1972 جىلى پايدالانۋعا بەرىلگەن جانە نورماتيۆتىك 40 جىلدىق قىزمەت مەرزىمىن وتەگەن. گاز قۇبىرىنىڭ وقشاۋلاۋ جابىنى مەن قۇبىر كورروزيا تۇرىندەگى زاقىمدانۋلار انىقتالدى. گازبەن جابدىقتاۋ جۇيەسىنىڭ قاۋىپسىزدىگى مەن سەنىمدى جۇمىسىن قامتاماسىز ەتۋ ءۇشىن گاز قۇبىرىن شۇعىل اۋىستىرۋ قاجەت بولدى.
بيىل قىركۇيەك ايىندا قالا اكىمى باستاماشى بولعان «ينۆەستيسياعا ايىرباس تاريف» رەسپۋبليكالىق باعدارلاماسى اياسىندا قۇرىلىس-مونتاجداۋ جۇمىستارى باستالدى. جۇمىستار وسى جىلدىڭ سوڭىنا دەيىن اياقتالادى. گاز قۇبىرى بۇقار جىراۋ بۋلۆارىنىڭ وڭتۇستىك جاعىنداعى جولدىڭ جيەكتاستارىنا جاقىن بولىگىندە توسەلۋدە. شۇڭقىردىڭ ەنى 0،8 مەتردەن 1 مەترگە دەيىن.
قۇرىلىس جۇمىستارى اياقتالعاننان كەيىن 3،5 مىڭعا جۋىق ابونەنت تۇراقتى گازبەن قامتاماسىز ەتىلەدى.