«اق جول» دەموكراتيالىق پارتياسى ۇلتتىق كەڭەسىنىڭ پلەنۋمى قازاقستاندا اتوم ەلەكتر ستانسياسىن (اەس) سالۋ ماسەلەسىن تالقىلادى.
بۇگىن پرەزيدەنت قاسىم-جومارت توقايەۆتىڭ سوڭعى جولداۋىندا جاريالانعان جالپىحالىقتىق رەفەرەندۋم ماسەلەسىنە بايلانىستى پارتيانىڭ رەسمي ۇستانىمىن انىقتاۋ ماقساتىندا «اق جول» دەموكراتيالىق پارتياسىنىڭ ۇلتتىق كەڭەسىنىڭ پلەنۋمى ءوتتى.
پلەنۋمدا ەنەرگەتيكا ءمينيسترى الماسادام ساتقالييەۆتىڭ بايانداماسى تىڭدالدى. ول ەلىمىزدەگى ينۆەستيسيالىق جوبالاردىڭ جۇزەگە اسىرىلۋىن تەجەيتىن پروبلەمالار، 8 گۆت ەلەكتر ەنەرگياسىنىڭ تاپشىلىعى، اتوم ەنەرگەتيكاسىن دامىتۋدىڭ بولاشاعى جانە اەس قۇرىلىسىنىڭ ءارتۇرلى نۇسقالارى تۋرالى اقپارات بەردى.
«اق جول» دەموكراتيالىق پارتياسى ءۇشىن وتاندىق بيزنەس پەن ونەركاسىپتى ەنەرگيامەن قامتاماسىز ەتۋ ەڭ وزەكتى ماسەلەلەردىڭ ءبىرى بولىپ تابىلادى. وسىعان وراي، ەنەرگەتيكا مينيسترلىگى وكىلدەرى، سونىڭ ىشىندە ۆيسە-مينيستر سۇڭعات ەسىمحانوۆ پەن «قازاقستان اتوم ستانسيالارى» ج ش س باس ديرەكتورى تيمۋر جانتيكين ۇلتتىق كەڭەس مۇشەلەرىنىڭ كوپتەگەن سۇراقتارىنا جاۋاپ بەردى.
ءماجىلىس ۆيسە-سپيكەرى دانيا ەسپايەۆا، ءماجىلىس دەپۋتاتتارى قازىبەك يسا، ەرلان بارلىبايەۆ، سونداي-اق باسقا دا پارتيا مۇشەلەرى ىقتيمال بالاما شەشىمدەر مەن اەس قۇرىلىسىنىڭ مەردىگەرىن تاڭداۋعا قاتىستى سۇراقتارىن قويدى.
تالقىلاۋ ناتيجەسىندە پلەنۋم اتوم ەنەرگەتيكاسىن دامىتۋ مەن اەس سالۋدى قولداپ، سالانى دامىتۋدىڭ پروگرەسسيۆتى جولىن تاڭداۋ قاجەت ەكەنىن اتاپ ءوتتى. سونىمەن قاتار، قاۋىپسىزدىكتى قامتاماسىز ەتۋ ماسەلەسىنە ەرەكشە كوڭىل ءبولىندى.