اباي وبلىس اكىمدىگىندە «SARAP» ساراپتامالىق كلۋبىنىڭ وڭىرلىك وتىرىسى ءوتتى. شاقىرىلعان سپيكەرلەر قازاقستاندا اتوم ەنەرگەتيكاسىن دامىتۋ پەرسپەكتيۆالارى تۋرالى ءسوز قوزعادى.
ريززات تاسىم، ق ر مادەنيەت جانە اقپارات مينيسترلىگىنىڭ قازاقستاندىق قوعامدىق دامۋ ينستيتۋتىنىڭ قوعامدىق مۇددەلەردى زەرتتەۋ ورتالىعىنىڭ جەتەكشىسى:
– بۇگىن ءبىز قىزىعۋشىلىق تانىتقان تاراپتاردىڭ ءوز پىكىرلەرىن ەركىن ءبىلدىرۋى ءۇشىن بەيتاراپ الاڭ ۇسىنامىز. پرەزيدەنت اتوم ەلەكتر ستانسياسىن (اەس) سالۋ بويىنشا جالپىۇلتتىق رەفەرەندۋمنىڭ ءوتۋ كۇنىن بەلگىلەپ بەردى. وسىعان بايلانىستى ءبىز بۇل سالاداعى ءپروفيلدى مامانداردى شاقىردىق. وزدەرىڭىز بىلەسىزدەر، بۇل ماسەلەگە بايلانىستى ەموسيالىق فون ءارتۇرلى بولدى. ءبىز، ءۇشىنشى تاراپ رەتىندە، الاڭىمىزدا بارلىق پىكىرلەر ايتىلسىن دەگەندى قالايمىز. باستى ماقساتىمىز – شەشىمدەر ەموسياعا ەمەس، بىلىكتى مامانداردىڭ ناقتى دەرەكتەرىنە سۇيەنە وتىرىپ قابىلدانۋى كەرەك.
كوپتەگەن قازاقستاندىقتار جاڭا نىسان بولاشاقتا ەكونوميكاعا، قورشاعان ورتاعا جانە حالىقتىڭ دەنساۋلىعىنا زيان تيگىزەدى دەپ الاڭداۋلى. الايدا، مامانداردىڭ الاڭداۋشىلىق تۋدىراتىن سۇراقتارعا ناقتى جاۋاپتارى بار. اەس – ءقاۋىپسىز ءارى ەكولوگيالىق تازا شەشىم دەپ سانايدى تەحنيكا عىلىمدارىنىڭ كانديداتى دەنيس زارۆا.
دەنيس زارۆا، ۇلتتىق يادرولىق ورتالىقتىڭ باس ينجەنەرىنىڭ ورىنباسارى، كۋرچاتوۆ قالاسى، اباي وبلىسى:
– قازىرگى قوعام اتوم ەنەرگەتيكاسىنىڭ جانە وسى تەحنولوگيالاردىڭ زاماناۋي جاعدايىمەن تولىق تانىس ەمەس. قاي جەردە ازداعان تۇسىنىسپەۋشىلىك بولسا، سول جەردە قورقىنىشتىڭ دا نەگىزى بولادى. قازاقستان رەسپۋبليكاسى اتوم ەنەرگەتيكاسىندا جاڭادان باستاۋشى ەمەس. بىلەتىندەرىڭىزدەي، بىزدە اقتاۋدا العاشقى تاجىريبەلىك ونەركاسىپتىك جىلدام نەيتروندار رەاكتورى بن-350 ۇزاق ۋاقىت بويى ءساتتى جۇمىس ىستەدى. قازىرگى ۋاقىتتا بىزدە ءۇش يادرولىق زەرتتەۋ رەاكتورى جۇمىس ىستەپ تۇر. ەكەۋى كۋرچاتوۆ قالاسىندا، ۇلتتىق يادرولىق ورتالىقتا، ال بىرەۋى الماتى قالاسىندا يادرولىق فيزيكا ينستيتۋتىندا ورنالاسقان. ءبىزدىڭ ەلدە اتوم ەنەرگەتيكاسىن دامىتۋعا بارلىق مۇمكىندىك بار. ءقازىر جەتكىزۋشىلەر ۇسىنعان III جانە III+ بۋىن رەاكتورلىق قوندىرعىلار مۇلدەم ءقاۋىپسىز، جانە ولاردى پايدالانۋ بارىسىندا ەشقانداي ماسەلە تۋىندامايدى.
دەنيس زارۆا ەلىمىزدىڭ عىلىمي-تەحنيكالىق الەۋەتىن جوعارى باعالادى. ونىڭ ايتۋىنشا، اتوم سالاسىندا ءقازىر 17 مىڭ قازاقستاندىق جۇمىس ىستەيدى، سوندىقتان كادر تاپشىلىعى بولماۋى ءتيىس.
دەنيس زارۆا، ۇلتتىق يادرولىق ورتالىقتىڭ باس ينجەنەرىنىڭ ورىنباسارى، كۋرچاتوۆ قالاسى، اباي وبلىسى:
– ۇكىمەت عىلىمي-تەحنيكالىق سالاداعى ءبىلىم بەرۋدى دامىتۋ بويىنشا ناقتى قادامداردى باستاپ كەتتى. ميفي سياقتى تانىمال ۋنيۆەرسيتەتتەرمەن بىرلەسكەن كافەدرالار اشىلۋدا. ءقازىردىڭ وزىندە جوعارى تەحنيكالىق ءبىلىم بار ماماندار جەتكىلىكتى. قانداي رەاكتور ءتۇرىن تاڭداساق تا، كەز كەلگەن جەتكىزۋشى وزدەرىنىڭ ترەناجەرلەرىندە ارنايى مامانداندىرىلعان دايىندىقتى قامتاماسىز ەتەدى، سول ارقىلى ماماندار ناقتى رەاكتور تۇرىمەن جۇمىس ىستەۋگە قابىلەتتى بولادى.
حالىقتى اەس-تى كىم سالاتىنى دا الاڭداتادى. قازىرگى ۋاقىتتا كورەيا، جۇڭگو، رەسەي جانە فرانسيادان كومپانيالار ءوز باستامالارىن ءبىلدىرىپ وتىر.