ءتيىستى زاڭ ماجىلىستە قارالىپ جاتىر.
بۇل تۋرالى دەنساۋلىق ساقتاۋ ءمينيسترى اجار عينيات حابارلادى. مينيستر ونىڭ ۆەدومستۆوسى بۇل زاڭدى قولدايتىنىن ايتتى، دەپ حابارلايدى Almaty-akshamy.kz.
ۆەدومستۆو باسشىسىنىڭ كەلتىرگەن دەرەكتەرىنە ساي، ەلىمىزدە ەرەسەك تۇرعىنداردىڭ 21%-ى تەمەكى تارتادى، بالالاردىڭ 20%-ى ارتىق دەنە سالماعىنان، ال 6%-ى سەمىزدىكتەن زارداپ شەگەدى. 11-15 جاستاعى جاسوسپىرىمدەردىڭ ۆەيپتەردى تۇراقتى تۇردە شەگۋى - 10%-دى، ەنەرگەتيكالىق، ءتاتتى سۋسىنداردى ءىشۋى -17،5%-دى قۇرايدى.
مينيستر اتاعانداي، تەمەكىنى تۇتىنۋدى ازايتۋ ءۇشىن 2023 جىلعى 1 قاڭتاردان باستاپ تەمەكى ونىمدەرىنە اكسيزدىڭ ستاۆكالارى كوتەرىلدى.
«تۇتىنۋدىڭ ەلەكتروندىق جۇيەلەرىنىڭ (ۆەيپتەر)، ولار ءۇشىن حوش يىستەندىرگىشتەر مەن سۇيىقتىقتاردىڭ اينالىمىنا تولىق تىيىم سالۋدى ەنگىزۋ بويىنشا ماجىلىستە زاڭعا وزگەرىستەر قاراستىرىلدى. 21 جاسقا دەيىنگى ادامدارعا ەنەرگەتيكالىق سۋسىنداردى ساتۋعا تىيىم سالۋدى ەنگىزۋ جونىندەگى نورمانى تالقىلاۋ ءراسىمى جۇرگىزىلىپ جاتىر»، - دەدى ول.
ەنەرگەتيكالىق سۋسىنداردىڭ زيانى جايلى سوڭعى كەزدەرى از ايتىلىپ جۇرگەن جوق. وسىنداي وقيعالاردىڭ ءبىرى وسى ايدىڭ باس كەزىندە الماتىدا بولعان ەدى. ەستەرىڭىزگە سالا كەتەيىك، سايتىمىزدىڭ 5 قىركۇيەك كۇنگى شىعارىلىمىندا ەنەرگەتيكالىق سۋسىن ىشكەن ءجاسوسپىرىمنىڭ اۋرۋحاناعا اۋىر حالدە جەتكىزىلگەنىن حابارلاعان بولاتىنبىز.