بيىل بەلگىلى جازۋشى، دراماتۋرگ ورالحان بوكەيدىڭ تۋعانىنا 80 جىل تولدى.
اتاۋلى مەرەيتوي قالامگەردىڭ تۋعان جەرى قاتونقاراعايدان باستاۋ الىپ، ءقازىر رەسپۋبليكا كولەمىندە تويلانۋدا. وسى ورايدا 28-30 قىركۇيەك ارالىعىندا جازۋشىنىڭ جاستىق شاعى وتكەن الماتى قالاسىندا دا ءبىرقاتار مەرەكەلىك ءىس-شارا جوسپارلانىپ وتىر، دەپ حابارلايدى Almaty-akshamy.kz.
الماتىداعى مەرەكەلىك شارالار لەگى ق ر ۇلتتىق كىتاپحانا عيماراتىندا ورالحان بوكەي كىتاپتارى مەن «ءتور التاي بوياۋلارى» پلەنەرىنە قاتىسقان سۋرەتشىلەردىڭ كورمەسىمەن باستالادى.
كورمەدەن سوڭ «ەل-شەجىرە» قوعامدىق قورىنىڭ ورالحان بوكەي شىعارماشىلىعىنا ارناپ ۇيىمداستىرعان «ءور التايدىڭ اسقاق جىرشىسى» اتتى كونفەرەنسياسى وتەدى.
30 قىركۇيەك كۇنى 11:00-دە الماتى قالاسىنىڭ «الاتاۋ» ءداستۇرلى ونەر تەاترىندا رەسپۋبليكالىق الامان ايتىس وتەدى. وعان رەسپۋبليكامىزدىڭ تۇكپىر-تۇكپىرىنەن جينالعان اقىندار قاتىسپاق. اتاپ ايتقاندا، ءسوز دوداسىنا جانسايا مۋسينا، مۇحتار نيازوۆ، مەيىربەك سۇلتانحان، ەرشات قايبولدين، اسپانبەك شۇعاتايەۆ، شۇعايىپ سەزىمحان، نۇرزات قارۋ قىزى، ەرجان ءامىروۆ، سەرىك قۋانعان، اقنيەت جۇبانىش، قازىرەت بەردىحان، تولەگەن جامانوۆ، ايبەك جەڭىسقازين، فارحات مارات ۇلى سياقتى سۋىرىپ سالما اقىندار ونەر كورسەتەدى.
ەسكە سالايىق، ورالحان بوكەيدىڭ 80 جىلدىعىنا ارنالعان مەرەكەلىك شارالار اۋىلدىق ايماقتاردى تۇراقتى دامىتۋ قورىنىڭ ۇيىتقى بولۋىمەن ءوتىپ جاتىر.