ق ر ەنەرگەتيكا ءمينيسترى ەرلان اقكەنجەنوۆ «قازمۇنايگاز» ۇك اق باسشىلىعىمەن جانە اتىراۋ، پاۆلودار، شىمكەنت مۇناي وڭدەۋ زاۋىتتارىنىڭ ديرەكتورلارىمەن كەزدەستى.
باسقوسۋدا 2040 جىلعا دەيىنگى مۇناي وڭدەۋ سالاسىن دامىتۋ تۇجىرىمداماسىنا سايكەس، ءوندىرىس قۋاتىن ارتتىرۋعا باعىتتالعان جوبالاردى جەدەلدەتۋ ماسەلەسى تالقىلاندى، - دەپ حابارلايدى Aqshamnews.kz
ماڭىزدى جيىن مەملەكەت باسشىسىنىڭ كومىرسۋتەكتەردى تەرەڭ وڭدەۋ جانە ەكونوميكانىڭ شيكىزاتقا تاۋەلدىلىگىن ازايتۋ جونىندەگى تاپسىرماسىن ىسكە اسىرۋعا باعىتتالعان. سونداي-اق، ۇكىمەت بەكىتكەن تۇجىرىمداماعا سايكەس، ەلىمىزدە مۇناي وڭدەۋ كولەمى جىلىنا 18 ميلليون توننادان 39 ميلليون تونناعا دەيىن، ياعني شامامەن ەكى ەسەگە ارتادى.
جوبالاردىڭ باستى شارتى – جانارماي جانە مۇناي-حيميا ءوندىرىسىن زاماناۋي سحەمامەن جۇزەگە اسىرۋ. بۇل جانارمايمەن قاتار جوعارى سۇرانىسقا يە مۇناي-حيميا ونىمدەرىن شىعارۋدى قامتاماسىز ەتەدى. ناتيجەسىندە ىشكى نارىقتى جانار-جاعارمايمەن تولىق قامتىپ، قوسىلعان قۇنى جوعارى ونىمدەردىڭ ەكسپورتتىق الەۋەتىن قالىپتاستىرۋعا مۇمكىندىك بەرەدى.
كەڭەستە اتالعان زاۋىتتاردىڭ جاڭعىرتۋ جوبالارىنىڭ اعىمداعى جاعدايى مەن جۇمىس كەستەسى جان-جاقتى تالقىلاندى. مينيستر شىمكەنت ءموز-ىنىڭ وندىرىستىك قۋاتىن جىلىنا 6-دان 12 ملن. تونناعا دەيىن ۇلعايتۋ جوباسىن شەتەلدىك سەرىكتەستەرمەن جەدەل ىسكە اسىرۋ قاجەتتىگىن اتاپ ءوتتى. وسى ماقساتتا بەيجىڭدە CNPC كومپانياسىمەن كەلىسسوزدەر جۇرگىزۋ جوسپارلانعان. سونىمەن بىرگە مينيستر پاۆلودار ءموز-دىڭ قۋاتىن 9 ملن. تونناعا دەيىن كوتەرۋ جوباسىن جىلدام ىسكە اسىرۋدى تاپسىردى. ال اتىراۋ موز-ىندە ءوندىرىس كولەمىن جىلىنا 6،7 ملن تونناعا دەيىن ۇلعايتۋ جانە زاۋىتتىڭ تيىمدىلىگىن ارتتىرۋ، سونىمەن قاتار جوندەۋ ارالىق كەزەڭدەرىن ۇزارتۋ جوبالارىنا ەرەكشە نازار اۋدارىلۋدا.
«ءاربىر مۇناي وڭدەۋ زاۋىتىنىڭ قۋاتىن ارتتىرۋ جوباسى مەنىڭ جەكە باقىلاۋىمدا. ماقساتىمىز سۇرانىستى قاناعاتتاندىرۋ عانا ەمەس، ونى الدىن الا قامتىپ، ەكونوميكالىق سەنىمدىلىكتى قالىپتاستىرىپ، ەلدى تولىق وتاندىق ونىممەن قامتاماسىز ەتۋ. مينيسترلىك بيۋروكراتيالىق كەدەرگىلەردى جويۋعا جانە ۆەدومستۆوارالىق ماسەلەلەردى شەشۋگە قولداۋ كورسەتەدى. وسى رەتتە، «قازمۇنايگاز» ۇك اق مەن زاۋىت باسشىلارىنىڭ جەدەلدەتىلگەن جوبا كەستەسىن قاتاڭ باقىلاۋدا ۇستاپ، جۇمىلا جۇمىس جاساۋىن تالاپ ەتەمىن»، – دەدى ق ر ەنەرگەتيكا ءمينيسترى ە.اقكەنجەنوۆ.
كەڭەس سوڭىندا كومپانيا باسشىلارىنا جوبالاردىڭ جول كارتالارىن جاڭارتۋ تاپسىرىلدى. ەنەرگەتيكا مينيسترلىگى ولاردىڭ ورىندالۋىن اي سايىن باقىلاپ وتىرادى.
جيىن قورىتىندىسىندا ۆەدومستۆو باسشىسى سالا ماماندارىن مۇناي-گاز كەشەنى قىزمەتكەرلەرى كۇنىمەن قۇتتىقتاپ، ارنايى ناگرادالار تابىستادى.
ايتا كەتەيىك، «مۇناي-گاز كەشەنىن دامىتۋعا قوسقان ۇلەسى ءۇشىن» توسبەلگىسىمەن اتىراۋ ءموز باس ديرەكتورى قۋانىش ءبيشىموۆ، پاۆلودار ءموز باس ديرەكتورى ءماجداي احمەتوۆ، شىمكەنت ءموز ءبىرىنشى ۆيسە-پرەزيدەنتى باقىت ەرەگەنوۆ ماراپاتتالدى. مۇناي-حيميا سالاسىندا 15 جىلدان استام ەڭبەك ەتىپ، مۇناي تاسىمالىن ءارتاراپتاندىرۋعا ۇلەس قوسقان جىبەك بەردىبەكوۆاعا «مۇناي-گاز سالاسىنىڭ قۇرمەتتى قىزمەتكەرى» توسبەلگىسى تابىستالدى.