قازاقستاننىڭ ەنەرگەتيكا مينيسترلىگى 2024–2025 جىلدارداعى جىلىتۋ ماۋسىمىنىڭ قورىتىندىسىن شىعارىپ، ەلدەگى گازبەن قامتۋ جۇيەسىنىڭ تۇراقتى جۇمىسىن جانە تابيعي گاز تۇتىنۋ كولەمىنىڭ ارتقانىن اتاپ ءوتتى
قازاقستان رەسپۋبليكاسى ەنەرگەتيكا مينيسترلىگىندە ۆيسە-مينيستر الىبەك جاماۋوۆتىڭ توراعالىعىمەن 2024–2025 جىلدارداعى كۇزگى-قىسقى كەزەڭنىڭ ءوتۋ قورىتىندىلارى جانە الداعى جىلىتۋ ماۋسىمىنا دايىندىق شارالارى بويىنشا كەڭەس ءوتتى.
كەڭەسكە «QazaqGaz Aimaq» اق باس ديرەكتورى باۋىرجان اسكاروۆ قاتىستى. ماۋسىم قورىتىندىسى بويىنشا ەلدىڭ گاز تاسىمالداۋ جانە گاز تاراتۋ جۇيەلەرى تۇتىنۋشىلاردى تۇراقتى ءارى ۇزدىكسىز گازبەن قامتاماسىز ەتتى. قازىرگى ۋاقىتتا الداعى جىلىتۋ ماۋسىمىنا دايىندىق باستالىپ كەتكەن. 2025 جىلدىڭ قاڭتارىندا، ياعني ەڭ جوعارى جۇكتەمە كەزەڭىندە، گازدىڭ ساعاتتىق ەڭ جوعارعى تۇتىنۋ كولەمى 4 582 مىڭ م³ء-تى قۇرادى. اۆاريالىق-ديسپەچەرلىك قىزمەت 46 مىڭنان استام ءوتىنىمدى وڭدەدى. 72،5 مىڭ كم-دەن استام جەلى مەن 35 مىڭعا جۋىق نىساندى 4 مىڭنان استام مامان، ونىڭ ىشىندە تاۋلىك بويى كەزەكشىلىك ەتەتىن بريگادالار قامتاماسىز ەتتى.
– «ىشكى تۇتىنۋ كولەمىنىڭ وسۋىنە جانە 2025 جىلدىڭ قاڭتارىن قوسا العاندا، قىسقى ماۋسىمدا جۇكتەمەنىڭ ارتۋىنا قاراماستان، گازبەن جابدىقتاۋ جۇيەلەرى تۇراقتى جۇمىس ىستەدى. بۇل بارلىق تارتىلعان قىزمەتتەردى جۇيەلى دايىنداۋدىڭ جانە ءوزارا ءتيىمدى جۇمىستىڭ ناتيجەسى»، - دەدى ۆيسە-مينيستر الىبەك جاماۋوۆ.
سونداي-اق، ول «QazaqGaz Aimaq» اق-عا 2025–2026 جىلدارداعى جىلىتۋ ماۋسىمىنا دايىندىق اياسىنداعى بارلىق ءىس-شارالاردى ۋاقتىلى اياقتاۋدى تاپسىردى. سونىمەن قاتار، الەۋمەتتىك قولداۋدىڭ قولجەتىمدىلىگى مەن اشىقتىعىن ارتتىرۋ قۇرالى رەتىندە «الەۋمەتتىك ءاميان» سيفرلىق سەرۆيسىن رەسپۋبليكانىڭ بۇكىل اۋماعىندا كەڭىنەن ەنگىزۋدى جەدەلدەتىپ جۇزەگە اسىرۋدى تاپسىردى.