قازاقستان رەسپۋبليكاسى وقۋ-اعارتۋ ءمينيسترى عاني بەيسەمبايەۆ «جۇڭگو – ورتالىق ازيا» ءبىلىم مينيسترلەرىنىڭ العاشقى كەڭەسىنە قاتىستى
ءۇرىمشى قالاسىندا جۇڭگو حالىق رەسپۋبليكاسى مەن ورتالىق ازيا ەلدەرى – قازاقستان، وزبەكستان، قىرعىزستان، تاجىكستان جانە تۇرىكمەنستاننىڭ ءبىلىم مينيسترلەرى، سونداي-اق ءتيىستى ۆەدومستۆولار مەن ديپلوماتيالىق كورپۋس وكىلدەرىنىڭ قاتىسۋىمەن العاشقى كەڭەس ءوتتى. جيىننىڭ باستى تاقىرىبى – ءبىلىم بەرۋ سالاسىنداعى ينتەگراسيا مەن ورنىقتى ارىپتەستىكتى قۇرۋ ماسەلەلەرى بولدى.
قازاقستان رەسپۋبليكاسىنىڭ وقۋ-اعارتۋ ءمينيسترى عاني بەيسەمبايەۆ ءوز سوزىندە قاتىسۋشى ەلدەر اراسىنداعى ىنتىماقتاستىقتى نىعايتۋ مەن ءبىلىم بەرۋ بويىنشا ورتاق باستامالاردى جۇزەگە اسىرۋدىڭ ماڭىزدىلىعىن اتاپ ءوتىپ، تەحنيكالىق جانە كاسىپتىك ءبىلىم بەرۋ سالاسىنداعى ودان ارعى ءوزارا ءىس-قيمىلدىڭ نەگىزگى باعىتتارىنا توقتالدى.
«قازاقستاندا مەملەكەت باسشىسى قاسىم-جومارت توقايەۆتىڭ باستاماسىمەن 2025 جىل جۇمىسشى ماماندىقتار جىلى دەپ جاريالاندى. قازىرگى ۋاقىتتا تەحنيكالىق جانە كاسىپتىك ءبىلىم بەرۋ جۇيەسىندە اۋقىمدى وزگەرىستەر جۇزەگە اسۋدا. ينتەرناسيونالداندىرۋ اياسىندا الەمنىڭ جەتەكشى كوللەدجدەرى مەن وندىرىستىك كاسىپورىندارىمەن سەرىكتەستىك ورناتىلىپ، بيزنەس قاۋىمداستىقپەن ىنتىماقتاستىق كەڭەيۋدە، پەداگوگتەر مەن ستۋدەنتتەر ءۇشىن اكادەميالىق ۇتقىرلىق جەتىلدىرىلۋدە. قازاقستان ىنتىماقتاستىققا اشىق جانە جاھاندىق ەڭبەك نارىعىندا سۇرانىسقا يە كادرلاردى دايارلاۋعا باعىتتالعان ورتاق تاسىلدەردى ازىرلەۋدى قولدايدى»، – دەدى عاني بەيسەمبايەۆ.
كەڭەس قورىتىندىسى بويىنشا قاتىسۋشى ەلدەر ءبىلىم مينيسترلەرىنىڭ كەڭەسى مەحانيزمىنىڭ جارعىسىن جانە «ءۇرىمشى دەكلاراسياسىن» قابىلدادى. بۇل قۇجاتتار الداعى ىنتىماقتاستىقتىڭ نەگىزىن ايقىنداپ، جوعارى بىلىكتى ماماندار دايارلاۋ ءىسىنىڭ باسىمدىقتارىن بەكىتەدى.
ايتا كەتەرلىگى، كەلەسى مينيسترلەر كەڭەسى قازاقستاندا وتەدى. روتاسيا تارتىبىنە سايكەس، ورتالىق ازيا ەلدەرى مەن قىتايدىڭ ءبىلىم مينيسترلەرىنىڭ ەكىنشى كەڭەسىن وتكىزۋ قۇقىعى مەن ءتوراعالىق ءبىزدىڭ ەلگە بەرىلدى.