قور كولەمى حالىقتىڭ بەنزينگە دەگەن قاجەتتىلىگىن تولىق قامتاماسىز ەتۋگە جەتكىلىكتى
ق ر ەنەرگەتيكا مينيسترلىگى الەۋمەتتىك جەلىدەگى «جانارماي بەكەتتەرىندە بەنزين جوق» دەگەن مالىمەتتى جوققا شىعاردى، دەپ حابارلايدى Almaty-akshamy.kz ۆەدومستۆانىڭ باسپا ءسوز قىزمەتىنە سىلتەمە جاساپ.
«ءبىرقاتار ب ا ق پەن الەۋمەتتىك جەلىلەردە «كەيبىر جانارماي قۇيۋ بەكەتتەرىندە بەنزين جوق» دەگەن اقپارات پايدا بولدى. ەنەرگەتيكا مينيسترلىگى مۇناي وڭدەۋ زاۋىتتارىندا جانار-جاعارماي ءوندىرىسى ۇزدىكسىز جۇرگىزىلىپ جاتقانىن حابارلايدى. قور كولەمى حالىقتىڭ بەنزينگە دەگەن قاجەتتىلىگىن تولىق قامتاماسىز ەتۋگە جەتكىلىكتى»، – دەپ جازادى مينيسترلىكتىڭ باسپا ءسوز قىزمەتى.
ۆەدومستۆونىڭ مالىمەتىنە سەنسەك، ەلدە بەنزين تاپشىلىعىن تۋعىزاتىنداي نەگىز بەن العىشارت جوق.
«ەگەر جانار-جاعارماي قۇيۋ ستانسيالارى بەنزيننىڭ جوقتىعىن العا تارتىپ، ساتۋدان باس تارتسا، بۇل تۋرالى اقپاراتتى دەرەۋ +7 777 999 52 18 WhatsApp ءنومىرى بويىنشا حابارلاۋدى سۇرايمىز. ەنەرگەتيكا مينيسترلىگىنىڭ ماماندارى اقپاراتتىڭ راستىعىن تەكسەرەدى. نارىقتا جانار-جاعارماي ماتەريالدارىنىڭ باعاسى نەگىزسىز ءوسۋى جانە جاساندى تاپشىلىق تۋعىزۋ ارەكەتتەرى فاكتىلەرى بويىنشا ءتيىستى شارالار قابىلداۋ ءۇشىن قۇزىرلى ورگاندارعا جولدانادى»، – دەلىنگەن رەسمي اقپاراتتا.