مەملەكەت باسشىسى قاسىم-جومارت كەمەل ۇلى توقايەۆ ەلىمىز باسقارۋدىڭ سۋپەرپرەزيدەنتتىك فورماسىنان تۇبەگەيلى باس تارتاتىندىعىن، پارلامەنتتىڭ، ءماسليحاتتاردىڭ وكىلەتتىكتەرىن كۇشەيتىپ، پارتيالىق-ساياسي سالا جاڭعىرتىلاتىنىن اتاپ ءوتتى.
ەندى سايلاۋشىلاردىڭ داۋىسى ءۇشىن باسەكەلەستىك بارىنشا وتكىرلەنە تۇسەدى. سونىمەن قاتار ADAL ساياسي پارتياسىنىڭ AMANAT پارتياسىنا قوسىلۋ ماسەلەسى قارالىپ، ساياسي كەڭەس قۇرامىنا وزگەرتۋلەر ەنگىزىلدى.
جالپى ءقازىر پارتيالىق جۇيەدە بەلسەندى ساياسي پارتيالاردىڭ كۇشەيۋگە بەت الا باستاعانىن بايقايمىز. ونىڭ ءبىر مىسالى ADAL پارتياسىنىڭ AMANAT پارتياسىنا قوسىلۋ تۋرالى شەشىمى. پارتيالاردىڭ نىعايۋ ۇدەرىسىن قولداۋ قاجەت، ول ازاماتتىق قوعامعا، پارتيالار، قاراپايىم ازاماتتار مەن مەملەكەتتىك قۇرىلىمدار اراسىنداعى ديالوگتىڭ تيىمدىلىگىنە وڭ اسەر ەتەدى.
پارتيالار سايلاۋشىلار ءۇشىن كۇرەس بارىسىندا تۇرعىنداردىڭ پروبلەمالارىنا جىلدام جاۋاپ بەرۋگە، ولاردى شەشۋ جولدارىن ۇسىنىپ، جاريالانعان شارالاردىڭ ورىندالۋىنا ۇمتىلادى. ءبىز دە AMANAT فراكسياسىنىڭ مۇشەسى جانە ءماسليحات دەپۋتاتى رەتىندە ەلىمىزدىڭ دامۋى جولىندا ايانباي ەڭبەك ەتەمىز.