كرەديتتەر نارىعى زەردەلەنىپ، سونىڭ ناتيجەسىندە قوسىمشا تالاپتار ەنگىزىلەدى.
بۇل تۋرالى قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ءبىرىنشى ورىنباسارى نۇرلان ءابدىراحمانوۆ مالىمدەدى، دەپ حابارلايدى Almaty-akshamy.kz
بيىل اگەنتتىك تۇتىنۋشىلىق كرەديتتەر نارىعىن تاعى ءبىر زەردەلەپ شىعادى. سونىڭ ناتيجەسىندە قوسىمشا تالاپتار ەنگىزىلەدى.
"سونىڭ ىشىندە سىياقى مولشەرلەمەسىن شەكتەۋ شارالارى دا بار. ودان كەيىن ميكروقارجى مەن كوللەكتورلىق ۇيىمداردى رەتتەۋ جاعى دا كۇشەيتىلەدى"، - دەدى ءابدىراحمانوۆ سەنات وتىرىسىندا.
ونىڭ ايتۋىنشا، سوڭعى ەكى جىلدىڭ ىشىندە 28 ميكروقارجى ۇيىمى مەن 37 كوللەكتورلىق اگەنتتىكتىڭ قىزمەتى توقتاتىلدى.
"بيىل ميكروقارجى ۇيىمدارى بويىنشا ونلاين كرەديت بەرۋ ماسەلەسىنە باسا نازار اۋدارىلادى. بۇر رەتتە كرەديت بەرۋ تالاپتارى عانا ەمەس، قارىز الاتىن ادامداردىڭ يدەنتيفيكاسياسىنا قاتىستى تالاپتار دا كۇشەيتىلەدى. نەگىزگى ماقسات – الاياقتىق جولمەن كرەديت بەرۋ فاكتىلەرىنە جول بەرمەۋ"، - دەپ اتاپ كورسەتتى ءابدىراحمانوۆ.