بۇل تۋرالى ورتالىق كوممۋنيكاسيالار قىزمەتىندە وتكەن بريفينگ بارىسىندا «قازگيدرومەت» رمك باسپا ءسوز حاتشىسى الينا يسماگۋلوۆا مالىمدەدى.
قازگيدرومەت 2 مامىرعا ارنالعان اۋا رايى بولجامىن ۇسىندى، دەپ حابارلايدى Almaty-akshamy.kz
«ەلدىڭ باسىم بولىگىندە اتموسفەرالىق فرونتالدى بولىمدەر اسەر ەتەدى، ونىمەن شىعىستا جاڭبىر جاۋادى، قاراعاندى، اباي، جەتىسۋ وبلىستارىندا تۇنگى ۋاقىتتا جاۋىن-شاشىن، شىعىستا، وڭتۇستىك-شىعىستىڭ تاۋلى اۋداندارىندا قاتتى جاۋىن-شاشىن (جاڭبىر، قار) بولادى. رەسپۋبليكا بويىنشا جەلدىڭ كۇشەيۋى كۇتىلەدى، نايزاعاي، وڭتۇستىك-شىعىستا - بۇرشاق، داۋىل، وڭتۇستىك-باتىستا شاڭدى داۋىل، سولتۇستىك-باتىستا - تۇمان كۇتىلەدى»، - دەدى الينا يسماگۋلوۆا وكق الاڭىندا وتكەن بريفينگتە.
تۇندە قاراعاندى، شىعىس قازاقستان، اباي وبلىستارىندا 1-3 گرادۋس ۇسىك كۇتىلەدى. ال ماڭعىستاۋ وبلىسىنىڭ باسىم بولىگىندە، اتىراۋ، قىزىلوردا، تۇركىستان، اباي، قاراعاندى، اقتوبە وبلىستارىندا ءورت ءقاۋپى جوعارى.