17 مەكتەپتىڭ جانىنان جاڭا وقۋ عيماراتتارىنىڭ قۇرىلىسى ءجۇرىپ جاتىر
بوستاندىق اۋدانىنداعى №199 گيمنازيا جانىنان جاڭا كورپۋس پايدالانۋعا بەرىلدى. قالا كۇنىندە لەنتاسى قيىلعان عيماراتتىڭ اشىلۋ سالتاناتىنا اكىم باقىتجان ساعىنتايەۆ ارنايى كەلدى. زاماناۋي، حالىقارالىق ستاندارتتارعا ساي جاڭا وقۋ عيماراتى بۇرىنعىسىنان 2 ەسە ۇلكەن، دەپ حابارلايدى اlmaty-akshamy.kz Almaty.tv-گە سىلتەمە جاساپ.
№199 مامانداندىرىلعان گيمنازيا 2018 جىلى بۇرىنعى №2ء-ىنشى بالالار ءۇيىنىڭ شاعىن عيماراتىندا اشىلعان ەدى. ونەر ورداسى بار بولعانى 3 جىل ىشىندە جوعارى ناتيجەلەرگە قول جەتكىزدى. تيىسىنشە، ءقازىر دارىندى بالالارعا ارنالعان مەكتەپ جالپى قالا اۋماعىندا ۇلكەن سۇرانىسقا يە. ءاۋ باستاعى ورىن تاپشىلىعى ماسەلەسى جاڭا كورپۋستىڭ ارقاسىندا تۇبەگەيلى شەشىلدى.
«ءبىزدىڭ گيمنازيامىزعا بۇكىل قالانىڭ دارىندى بالالارى وقۋعا كەلەتىندىكتەن، بۇرىنعى عيماراتىمىزدا ورىن جەتپەگەن. قازىرگى تاڭدا مىنا عيمارات قوسىلعاننان كەيىن بالالارعا كەلىپ، ءوتىنىش جاساپ، وقۋعا كەلۋگە مۇمكىندىك تۋدى»، – دەدى №199 مامانداندىرىلعان گيمنازيانىڭ ديرەكتورى ساندۋعاش نىشانوۆا.
ءبىلىم وشاعى ەداۋىر ۇلكەيىپ، مۇندا ءقازىر 900-گە جۋىق وقۋشى ءبىلىم الادى. وقۋ ورداسىندا يتاليان ءتىلى مەن بەينەلەۋ ونەرى تەرەڭدەتىلىپ وقىتىلادى. مەكتەپتىڭ باستى ارتىقشىلىعى مۇندا بىلىكتىلىگى جوعارى مۇعالىمدەر جۇمىس ىستەيدى.
جاڭا عيماراتتىڭ ىشىندە قازاقستاندىق جانە الەمگە ايگىلى سۋرەتشىلەردىڭ تۋىندىلارى ىلىنگەن. بالانىڭ شىعارماشىلىعىن بارىنشا اشۋعا بار جاعداي جاسالعان. ال، مەكتەپكە قولى جەتە الماي جۇرگەن تۇرعىنداردىڭ قۋانىشىندا شەك جوق.
«الدىڭعى كىشكەنتاي مەكتەپتە بالالار ءبىر-بىرىن كۇتىپ، ساباقتان كەش شىعاتىن. ەندى ءقازىر ورىن كوپ، مەكتەپ جاڭا، تالاپتارعا ساي. ەندى بالالارىمىز كەڭ جەردە وقيدى جانە قوسىمشاعا بارۋعا ۋاقىتى بولادى»، – دەدى اتا-انا اقمارال ساعيبەكوۆا.
جاڭا كورپۋستا كوۆوركينگ زالىمەن قامتىلعان كىتاپحانا بار. ونىمەن قوسا، بەيىن پاندەر بويىنشا كەسكىندەمە، سۋرەت، ءمۇسىن، يتاليان ءتىلى كابينەتتەرى زاماناۋي قۇرالدارمەن جابدىقتالعان.
«ءبىزدىڭ كەزىمىزدە زاماناۋي قۇرالدارمەن جابدىقتالعان سىنىپتار بولعان جوق. ءقازىر مىنە حالىقتىڭ تالابىنا ساي، ۇلكەن مەملەكەتىمىزدىڭ جوسپارىنا بايلانىستى وسىنداي مەكتەپتەر سالىنۋى كەرەك. جاڭا وزدەرىڭىز كورگەندەي، وقۋشىلارعا بۇكىل جاعداي جاسالىپ جاتىر. سونىڭ ءبارى ءبىزدىڭ جاستارىمىزدىڭ بولاشاعىنا جۇمىس جاسايدى»، – دەدى ارداگەر ۇستاز اسەم بەسپايەۆا.
وسىلايشا، شاھاردا مەكتەپتەردەگى ورىن تاپشىلىعى ماسەلەسى قارقىندى تۇردە شەشىلىپ جاتىر. بيىل مەگاپوليستە 12 مىڭ 600 ورىنعا ارنالعان 8 جاڭا مەملەكەتتىك ءبىلىم ورداسى سالىنۋدا. ال، 17 مەكتەپتىڭ جانىنان جاڭا وقۋ عيماراتتارىنىڭ قۇرىلىسى ءجۇرىپ جاتىر.
«قالادا 17 مەكتەپتىڭ جاڭا كورپۋسى سالىنىپ جاتىر. سونىڭ ارقاسىندا 8263 ورىن پايدا بولادى. توعىزى قولدانىسقا بەرىلىپ تە قويدى. قالعان 8 مەكتەپ بيىل قازان ايىنىڭ سوڭىنا دەيىن اياقتالادى. سونداي-اق، وسى وقۋ جىلىندا 11 جەكەمەنشىك مەكتەپ وقۋشىلارعا ەسىگىن ايقارا اشتى»، – دەدى قالالىق ءبىلىم باسقارماسى باسشىسىنىڭ ورىنباسارى قايرات جۇمانوۆ.
ايتا كەتەيىن، بيىلعى وقۋ جىلىندا 289 مەكتەپتە 300 مىڭنان اسا وقۋشى ءبىلىم الىپ جاتىر.