حابارلاما اراسىندا اسكەري قىزمەتتەن زاڭسىز بوساتىلعانى تۋرالى ارىز، تۇرعىن ءۇي تولەمدەرى بويىنشا شاعىمدار بار.
ءبىر اي بۇرىن اسكەري پوليسيا باس باسقارماسى ارميادا بولىپ جاتقان وقيعالار تۋرالى اقپارات الۋ ءۇشىن سايت جانە ءموبيلدى قوسىمشانى ىسكە قوستى. وسى ورايدا جاڭا جوبانىڭ قۇقىق بۇزۋشىلىقپەن كۇرەسۋدىڭ، سونداي-اق كەرى بايلانىس ورناتۋدىڭ جاڭا قۇرالى رەتىندە قانشالىقتى ماڭىزدى ەكەنىن قارۋلى كۇشتەر اسكەري پوليسياسى باس باسقارماسىنىڭ وفيسەرى پودپولكوۆنيك نۇرلان تايعارايەۆ ايتىپ بەردى، دەپ حابارلايدى اlmaty-akshamy.kz قازاقپارات-قا سىلتەمە جاساپ.
«اسكەري سەنىم» جوباسىنىڭ نەگىزگى ماقساتى – اسكەري پوليسيا ورگاندارىنىڭ اسكەري قىزمەتشىلەرىمەن، ولاردىڭ وتباسى مۇشەلەرىمەن، ازاماتتىق تۇلعالارمەن ءوزارا بايلانىس ورناتۋى. ياعني، كەز كەلگەن اسكەري قىزمەتشى، ازاماتتىق تۇلعا وسى قوسىمشانى ءوزىنىڭ موبيلدىك تەلەفوندارىنا ورناتىپ، ولارعا بەلگىلى بولعان زاڭسىز ارەكەتتەر بويىنشا بىزگە حابارلاما بەرە الادى»، - دەدى ن. تايعارايەۆ.
اتاپ ايتقاندا، بۇل جوبا ىسكە قوسىلعانىنا شامامەن ءبىر اي بولدى. اسكەري پوليسياسى باس باسقارماسى وفيسەرىنىڭ ايتۋىنشا، ءبىر اي ىشىندە اسكەري قىزمەتشىلەر اسكەري بولىمدەر مەن مەكەمەلەردە موبيلدىك قوسىمشاعا قوسىلۋ ادىستەرى مەن مۇمكىندىكتەرى تۋرالى جۇمىس جۇرگىزدى. قازىرگى ۋاقىتتا شامامەن 2،5 مىڭ ادام قوسىمشانى جۇكتەدى.
«اپتاسىنا شامامەن 8-10 حابارلاما كەلىپ تۇسەدى. باعدارلاما باستالعاننان بەرى شامامەن 50 حابارلاما كەلدى. حابارلاما اراسىندا اسكەري قىزمەتتەن زاڭسىز بوساتىلعانى تۋرالى ارىز، تۇرعىن ءۇي تولەمدەرى بويىنشا شاعىمدار بار. مىسالى، تاراز گارنيزونىندا اسكەري قىزمەتىن وتكەرىپ جۇرگەن ساربازدىڭ اناسى ءبولىم باسشىلىعىنىڭ اركەتتەرى بويىنشا ارىزداندى. گوپيتالدەن شىعىپ، وڭالتۋدا جۇرگەن بالاسىن كەزەكشىلىككە قويعان. وسىلايشا، ءار حابار بويىنشا تەكسەرىس جۇرگىزىپ، قولدانۋشىلارعا جاۋابىن بەرەمىز»، - دەدى نۇرلان تايعارايەۆ.
سونىمەن قاتار ول قازاقستان اسكەرىندە قۇقىق بۇزۋشىلىقپەن كۇرەس جايىندا ايتىپ بەردى.
«زاڭ بۇزۋشىلىقتى ازايتۋ ماقساتىندا اسكەرلەردە «ارميادا قىلمىسقا ورىن جوق» باعدارلاماسى جۇزەگە اسىرىلىپ جاتىر. ونىڭ اياسىندا پروفيلاكتيكالىق ونكۇندىك، ايلىقتار، ءارتۇرلى اكسيا وتكىزىلەدى. مىسالى، سىبايلاس جەمقورلىققا جول بەرمەۋ ماقساتىندا اسكەري قىزمەتتەن بوساتۋ مەن كەيىنگە قالدىرۋعا ۇسىنىلعاندار تۋرالى شاقىرۋ كوميسسياسىنىڭ شەشىمدەرى قاراستىرىلۋدا. مۇنىمەن قوسا، جىلدىڭ اياعىنا قاراي، ءبىز قىلمىستىق قۇقىق بۇزۋشىلىقتىڭ 10-15%-عا تومەندەۋىن كۇتەمىز»، - دەدى ن. تايعارايەۆ.
ەسكە سالا كەتەيىك، قازاقستان قارۋلى كۇشتەرىنىڭ اسكەري پوليسياسى باس باسقارماسى ازاماتتاردان ارمياداعى قۇقىق بۇزۋشىلىقتار تۋرالى اقپارات قابىلداۋ ءۇشىن موبيلدىك قوسىمشاسى بار askeri-senim.kz سايتىن ازىرلەدى.