بۇل - وتاندىق مەرگەندەر ءۇشىن ەڭ جوعارعى كورسەتكىش.
شىمكەنتتە نىسانا كوزدەۋدەن 14ء-شى ازيا چەمپيوناتى اياقتالدى. قۇرلىقتىق جارىس ناتيجەسى بويىنشا قازاقستان كومانداسى 12 التىن جەڭىپ الدى، دەپ حابارلايدى اlmaty-akshamy.kz Olympic.kz-كە سىلتەمە جاساپ.
قازاقستاندىق مەرگەندەر 12 التىن، 12 كۇمىس جانە 12 قولا مەدالمەن جالپىكوماندالىق ەسەپتە كوش باستادى. ەكىنشى ورىنعا 5 التىن، 8 كۇمىس جانە 4 قولا مەدال جەڭىپ العان وزبەكستان كومانداسى، ءۇشىنشى ساتىعا 5 التىن جانە 3 كۇمىس يەلەنگەن يندونەزيا قۇراماسى جايعاسقان. ازيا بىرىنشىلىگىنە قۇرلىقتىڭ 10 مەملەكەتىنەن 176 سپورتشى قاتىستى. كوماندالار اراسىنان كۋۆەيت قۇراماسى عانا جۇلدەسىز قالدى. نىسانا كوزدەۋدەن قازاقستان كومانداسىنىڭ باس باپكەرى ولگا دوۆگۋننىڭ ايتۋىنشا، بۇل - وتاندىق مەرگەندەر ءۇشىن ەڭ جوعارعى كورسەتكىش.
«ءبىز ازيا چەمپيوناتى سىندى ءىرى باسەكەنى ءوز جەرىمىزدە العاش رەت وتكىزىپ تۇرمىز. وسى ورايدا، اتالعان بىرىنشىلىك ۇيىمداستىرۋ جاعىنان دا بىزگە ۇلكەن تاجىريبە بولدى. قۇرلىقتىق دودا ءوز ەلىمىزدە ءوتىپ جاتقاندىقتان، ەرەسەكتەر مەن جاسوسپىرىمدەر اراسىندا تولىق قۇرام قاتىستىرۋعا، الداعى بۋىندى دا ءبىر تەكسەرىپ الۋعا تىرىستىق. ازيا چەمپيوناتىنداعى ناتيجەمىز كوڭىلدەن شىعارى. قازاقستان رەكوردى جاڭارعانىن كوردىڭىزدەر. جاي عانا جاڭارىپ قويعان جوق، مۇنداي ناتيجەمەن الەمدىك جارىستاردا فينالعا ءوتىپ، جۇلدەگە تالاسۋعا مۇمكىندىك بار. بارلىق سپورتشىلار وزدەرىن جاقسى قىرىنان كورسەتتى. جاسوسپىرىمدەر مۇنداي ءىرى جارىسقا العاش قاتىسىپ تۇرسا دا، اتاقتى قارسىلاستارىنان قورىقپاي، فينالدا جاقسى ناتيجە تىركەدى. ەرەسەكتەر اراسىنان ەل رەكوردىن جاڭارتقان يسلام ۋسەينوۆتى ەرەكشە اتاپ وتكىم كەلەدى. جاسوسپىرىمدەر اراسىنان نيكيتا شاحتورين كوزگە ءتۇستى. ول دا ەل رەكوردىنا تۇزەتۋ ەنگىزدى. وسى دودا ارقىلى ءبىز جاس سپورتشىلاردىڭ الەۋەتىن دە ءبىر سىناپ الدىق. ازيا چەمپيوناتىن ابىرويمەن وتكىزگەنى ءۇشىن بارلىق سپورتشىلارعا، باپكەرلەر مەن ۇيىمداستىرۋشىلارعا العىس ايتامىن»،- دەيدى باس باپكەر ولگا دوۆگۋن.
شىمكەنتتە وتكەن ازيا چەمپيوناتىندا التىن مەدال جەڭىپ العان قازاقستاندىق سپورتشىلار:
1. يسلام ۋسەينوۆ (جەكەلەي سىن، كوماندالىق سىن، ق ر رەكوردى)
2. ەلدار يمانقۇلوۆ (جەكەلەي جانە كوماندالىق سىن)
3. زۋحرا يرنازاروۆا (جەكەلەي سىن)
4. نيكيتا شاحتورين (جەكەلەي جانە كوماندالىق سىن، جاسوسپىرىمدەر اراسىندا ەل رەكوردى)
5. الەكساندرا لە (جەكەلەي سىن، جاسوسپىرىمدەر)
6. سالتانات ازىمبايەۆا (جەكەلەي سىن، جاسوسپىرىمدەر)