مەملەكەت باسشىسى جاقىندا قول قويعان زاڭعا سايكەس، بالالار لاگەرلەرىنىڭ قىزمەتى 2026 جىلعى 1 ساۋىردەن باستاپ ليسەنزيالانادى، دەپ حابارلايدى aqshamnews.kz وقۋ-اعارتۋ مينيسترلىگىنىڭ مالىمەتىنە سىلتەمە جاساپ.
مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە تاريحي-مادەني مۇرا وبەكتىلەرىن قورعاۋ جانە ءبىلىم بەرۋ-ساۋىقتىرۋ قىزمەتتەرى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى.
كوميتەت مالىمەتىنشە، قابىلدانعان تۇزەتۋلەر بالالارعا ارنالعان قوسىمشا ءبىلىم بەرۋدى دامىتۋعا باعىتتالعان جانە ءبىلىم بەرۋ-ساۋىقتىرۋ قىزمەتتەرىن كورسەتەتىن جىل بويى جانە ماۋسىمدىق ستاسيونارلىق بالالار لاگەرلەرىنىڭ قىزمەتىنە قاتىستى.
"2026 جىلدان باستاپ قوسىمشا ءبىلىم بەرۋ ۇيىمدارى ەكى ساناتقا بولىنەدى. ءبىرىنشى سانات – قىزمەتى ليسەنزيالاۋعا جاتاتىن ءبىلىم بەرۋ-ساۋىقتىرۋ قىزمەتتەرىن كورسەتەتىن ۇيىمدار. ەكىنشى سانات – حابارلامالىق تارتىپپەن جۇمىس ىستەيتىن قوسىمشا ءبىلىم بەرۋ ۇيىمدارى. مۇنداي ءتاسىل سالانى رەتتەۋدى جەڭىلدەتۋگە ءارى كورسەتىلەتىن قىزمەتتەردىڭ ساپاسى مەن سەنىمدىلىگىن ارتتىرۋعا مۇمكىندىك بەرەدى. بالالاردىڭ قاۋىپسىزدىگى مەن قىزمەت ساپاسىن قامتاماسىز ەتۋ ماقساتىندا بالالار لاگەرلەرىنىڭ قىزمەتى 2026 جىلعى 1 ساۋىردەن باستاپ ليسەنزيالانادى. بۇل بالالاردىڭ دەمالىسى، وقۋى جانە ساۋىقتىرۋى ءۇشىن قويىلاتىن ءبىرىڭعاي تالاپتاردى بەلگىلەۋگە مۇمكىندىك بەرەدى"، - دەيدى كوميتەت وكىلدەرى.
جاڭا زاڭعا سايكەس ليسەنزيانىڭ قولدانىلۋ مەرزىمى ءبىر جىلدان بەس جىلعا دەيىن ۇزارتىلدى. بۇل ۇيىمدارعا تۇسەتىن اكىمشىلىك جۇكتەمەنى ازايتىپ، قۇجاتتاردى جىل سايىن قايتا راسىمدەۋ قاجەتتىلىگىن بولدىرمايدى. ليسەنزيانىڭ بەس جىلعا بەرىلۋى ۇيىمداردىڭ قىزمەتىنىڭ تۇراقتىلىعى مەن مەملەكەتتىك باقىلاۋدى جۇيەلى تۇردە جۇزەگە اسىرۋ اراسىنداعى تەپە-تەڭدىكتى قامتاماسىز ەتەدى.
قابىلدانعان شارالار بالالاردىڭ دەمالىسى، وقۋى جانە ساۋىقتىرۋى ءۇشىن ءقاۋىپسىز ءارى ساپالى جاعدايلار جاساۋعا، سونداي-اق ەلىمىزدە ءبىلىم بەرۋ-ساۋىقتىرۋ قىزمەتتەرىن كورسەتۋدىڭ ءبىرىڭعاي ستاندارتىن قالىپتاستىرۋعا باعىتتالعان.
قازىرگى تاڭدا قوسىمشا ءبىلىم بەرۋ جۇيەسى ۇيىمدارىنىڭ قىزمەتىن رەتتەيتىن ءتيىستى نورماتيۆتىك قۇقىقتىق اكتىلەرگە وزگەرىستەر مەن تولىقتىرۋلار ەنگىزۋ جۇمىستارى ءجۇرىپ جاتىر.