تاۋەلسىزدىك كۇنى تەك 16 جەلتوقساندا اتاپ وتىلەدى.
قازاقستاندا جەلتوقسان ايىنداعى دەمالىس كۇندەردىڭ سانى قىسقاردى، دەپ حابارلايدى Almaty-akshamy.kz
نورماتيۆتىك-قۇقىقتىق اكتىلەردىڭ اقپاراتتىق-قۇقىقتىق جۇيەسىندە «قازاقستان رەسپۋبليكاسىنداعى مەرەكەلەر تۋرالى» زاڭنىڭ جاڭا رەداكسياسى جاريالاندى.
وعان سايكەس، ەندى قازاقستاندىقتار تاۋەلسىزدىك كۇنىن تەك 16 جەلتوقساندا اتاپ وتەدى. سايكەسىنشە، سول كۇنى دەمالادى. ال 17 جەلتوقسان – جۇمىس كۇنى.
سونداي-اق تاۋەلسىزدىك كۇنى «ۇلتتىق مەرەكە» دەگەن مارتەبەسىنەن ايىرىلدى. بۇدان بىلاي ول مەملەكەتتىك مەرەكە سانالادى.
بۇعان دەيىن زاڭ بويىنشا تاۋەلسىزدىك كۇنى 16 جانە 17 جەلتوقسان اتالىپ وتەتىن.
سونىمەن قاتار وسى زاڭدا 1 جەلتوقسان – تۇڭعىش پرەزيدەنت كۇنى مەملەكەتتىك مەرەكەلەر قاتارىنان الىنىپ تاستالدى. ەندى بۇل كۇنى دەمالىس بولمايدى.
بۇدان بولەك، كۇنتىزبەگە 25 قازاندا تويلاناتىن ۇلتتىق مەيرام – رەسپۋبليكا كۇنى ەنىپ وتىر.
ايتا كەتەرى، بيىل ەل حالقى رەسپۋبليكا كۇنىنە وراي قاتارىنان ءۇش كۇن – 23، 24 جانە 25 قازان دەمالادى. ال سەنبى، 22 قازان جۇمىس ىستەيدى.
كەشە پرەزيدەنت قاسىم-جومارت توقايەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كينەماتوگرافيا، مادەنيەت جانە مەرەكەلەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.