«قۋاتتى ۇلتتىڭ دىڭگەگى – حالىق. كاسىبيلىك پەن ەڭبەكقورلىق قوعامىمىزدا ەڭ جوعارى ورىندا تۇرۋى كەرەك. تاعى دا قايتالاپ ايتامىن. ەلىمىزدە ەڭبەكقور ادام، كاسىبي مامان ەڭ سىيلى ادام بولۋعا ءتيىس. وسىنداي ازاماتتار مەملەكەتىمىزدى دامىتادى. ءبىز قاراپايىم ەڭبەك ادامىنا قۇرمەت كورسەتۋىمىز كەرەك. قانداي كاسىپپەن اينالىسساڭ دا، ونى ساپالى اتقارۋ ماڭىزدى»، – دەدى مەملەكەت باسشىسى قاسىم-جومارت توقايەۆ حالىققا ارناعان جولداۋىندا.
ءبىزدىڭ قوعامدىق بىرلەستىك، ياعني كاسىپوداق قۇرىلعالى بەرى، مىنە، وسى ەڭبەك ادامىنىڭ مارتەبەسى، قۇقىعى جولىندا جۇيەلى جۇمىس ىستەپ كەلەمىز. كاسىپوداق كوميتەتىنىڭ ءبىر ارتىقشىلىعى، جۇمىس بەرۋشىگە تاۋەلسىز بولىپ كەلەدى. سوندىقتان جۇمىس بەرۋشىمەن تەڭ دارەجەدە سويلەسىپ، ەڭبەككەردىڭ قۇقىعى بۇزىلىپ جاتقان جاعدايدا، ونى تۇزەۋدى تالاپ ەتە الامىز. بىزگە مۇشە مەكەمەلەردەگى جۇمىسكەرلەر مەن قىزمەتكەرلەردىڭ ەڭبەك قۇقىقتارى مەن الەۋمەتتىك-ەكونوميكالىق مۇددەلەرىن قورعاۋدى قامتاماسىز ەتىپ، ءار مەكەمەدە باستاۋىش كاسىپوداق ۇيىمىنىڭ قۇرىلۋىنا جانە ۇجىمدىق كەلىسىمشارتتىڭ ساپالى جاسالۋىنا ءمان بەرىپ وتىرامىز.
بۇگىندە وراسان زور ماڭىزعا يە ۇجىمدىق شارتتار جاساۋ مەن ولاردى ساپالى ورىنداۋدى ۇيىمداستىرۋ جۇمىسىن ەرەكشە اتاپ وتسەم دەيمىن. ۇجىمدىق كەلىسىمشارت – جۇمىسكەرلەردىڭ الەۋمەتتىك ەڭبەك قۇقىقتارىن قورعاۋعا قاتىستى بارلىق ماسەلەنىڭ شەشىمىن تابا الاتىن باستى قۇجات. سەبەبى، اتالعان قۇجاتتا جالدامالى جۇمىسكەرلەرگە بەرىلەتىن قوسىمشا الەۋمەتتىك كەپىلدىكتەر زاڭدى تۇردە بەكىتىلەدى.
ۇجىمدىق شارتتار دايىنداۋ بارىسىنداعى ماڭىزدى نارسەنىڭ ءبىرى – ول رەسمي تۇردە مەملەكەتتىك ەڭبەك ينسپەكتورىنان تىركەۋدەن وتەدى. ۇجىمدىق شارتتاردا جۇمىسكەرلەرگە الەۋمەتتىك-تۇرمىستىق جاعدايلار جاساۋ ماسەلەلەرىنە باستى كوڭىل بولىنەدى. ماسەلەن، جىل سايىنعى ەڭبەك دەمالىستارىنا، قوسىمشا دەمالىستارىنا، سىرقاتتانعان ۋاقىتتاعى قوسىمشا تولەمدەر، بالالار ساۋىقتىرۋ لاگەرلەرىنە جولدامالار ساتىپ الۋ، كومەككە مۇقتاج ادامدار مەن زەينەتكەرلەرگە قايىرىمدىلىق كومەك جاساۋ، كاسىپورىن جۇمىسىنىڭ تۇراقتىلىعىن قامتاماسىز ەتۋگە كومەكتەسۋ سىندى ءىس-شارالار بار.
جۋىردا ءبىزدىڭ قوعامدىق بىرلەستىككە مۇشە كاسىپوداق كوميتەتتەرىنىڭ باسشىلارى «دوڭگەلەك ۇستەل» باسىندا باس قوسىپ، پرەزيدەنت جولداۋىندا ايتىلعان مىندەت-ماقساتتاردى، ونىڭ ىشىندە ءبىزدىڭ سالاعا قاتىستى ەڭبەك ادامىنىڭ مارتەبەسىن كوتەرۋ ماسەلەسىن تاقىلادىق. سونداي-اق، الماتى ىرگەسىندە جاتقان قاراساي اۋداندىق كاسىپوداق كوميتەتىنە قاراستى بەلسەندى باستاۋىش كاسىپوداقتارىنىڭ تاجىريبەلەرى ۇلگى ەتىلدى. ماسەلەن، وسى اۋدانداعى ءىرى كاسىپورىنداردىڭ ءبىرى «ازيااگروفۋد» اق مەكەمەسى اۋىلشارۋاشىلىق ونىمدەرىن وندىرۋمەن اينالىسادى. بۇگىنگى كۇنى كاسىپورىندا 500-گە جۋىق ادام ەڭبەك ەتۋدە. ۇجىمدىق شارتتىڭ تارماقشالارىندا كورسەتىلگەندەي بارلىق كاسىپوداق مۇشەلەرى ءبىر مەزگىلدىك ىستىق تاماقپەن قامتاماسىز ەتىلەدى. سول سياقتى «جوندەۋ-قۇرىلىس» ج ش س دا اۋداندا بەدەلگە يە. كاسىپورىن عيماراتتار سالۋمەن جانە قۇرىلىس ماتەريالدارىن وندىرۋمەن اينالىسادى. كاسىپورىندا 160 ادام جۇمىس ىستەيدى. باستاۋىش كاسىپوداق ۇيىمى 2010 جىلى قۇرىلىپ، اۋداندىق كاسىپوداق كوميتەتىنىڭ قۇرامىنا كىرگەن. وسى ەكى كاسىپورىندا جاسالىنعان ۇجىمدىق شارتقا سايكەس جۇمىسشىلار ارنايى تاسىمالدانادى.
قاراساي اۋداندىق كاسىپوداق كوميتەتىنىڭ تاراپىنان «مەكتەپكە جول» قايىرىمدىلىق اكسياسى اياسىندا كاسىپوداق مۇشەلەرىنىڭ كوپ بالالى، الەۋمەتتىك جاعدايى تومەن وتباسىلارىنىڭ بالالارىنا مۇمكىندىگىنشە قايىرىمدىلىق كومەك كورسەتىلىپ، كاسىپوداق مۇشەلەرىنىڭ 15 بالاسى 2022-2023 جاڭا وقۋ جىلىنا قاجەتتى وقۋ قۇرال-جابدىقتارىمەن قامتاماسىز ەتىلىپ، ول ءۇشىن 435 مىڭ تەنگە قاراجات جۇمسالدى. سونىمەن قاتار وتكەن جىلى اۋداندىق ءبىلىم ءبولىمىنىڭ ءوتىنىشى نەگىزىندە ۇيدەن وقىتىلاتىن جارتىلاي جەتىم، جاعدايى تومەن وتباسىلاردىڭ بالالارى پلانشەتپەن قامتاماسىز ەتىلۋ ءۇشىن كاسىپوداق تاراپىنان 700 مىڭ تەڭگە ءبولىنىپ، كومەك كورسەتىلدى.
ارينە، مۇنداي جەتىستىكتەرىمىزدى تىزە بەرۋگە بولادى. بۇل جەردەگى ايتپاعىمىز، ەڭبەك ادامىنىڭ وتباسىنداعى تىنىس-تىرشىلىگى جايلى بولسا، ونىڭ سىرتتاعى ەڭبەگى ءونىمدى، كوڭىل كۇيى دە كوتەرىڭكى بولماق. مەملەكەت باسشىسىنىڭ ەڭبەك ادامىنىڭ مارتەبەسىن كوتەرۋ كەرەك دەپ وتىرعانى دا سول.
بيىلعى 20 قاراشادا وتەتىن پرەزيدەنت سايلاۋىندا دا ەڭبەك ادامىنىڭ داۋىسى اسا ماڭىزدى. بۇل بارشامىزعا بەرىلىپ وتىرانا ۇلكەن مۇمكىندىك. ال كەلەسى جىلى ءماجىلىس جانە ءماسليحات دەپۋتاتتارىنىڭ سايلاۋى وتەدى. سودان كەيىن ۇكىمەت قۇرامى جاساقتالادى. سونىڭ ناتيجەسىندە 2023 جىلدىڭ ورتاسىندا پرەزيدەنت، پارلامەنت، ۇكىمەت سياقتى نەگىزگى ساياسي ينستيتۋتتاردىڭ ءبارى قايتا جاڭعىرىپ، جاڭارادى. ءبىز جاقسى كۇندەرگە ءۇمىت ارتامىز.