بۇكىل الەم قوعامداستىعىنىڭ كۇش-جىگەرىن بىرىكتىرۋ قاجەت.
سەنات ءتوراعاسىنىڭ ورىنباسارى اسقار شاكىروۆ ەقىۇ پارلامەنتتىك اسسامبلەياسىنىڭ ەكونوميكالىق ماسەلەلەر، عىلىم، تەحنولوگيا جانە قورشاعان ورتا جونىندەگى كوميتەتىنىڭ كەڭەسىنە ونلاين تۇردە قاتىسىپ، ءسوز سويلەدى. وندا ەقىۇ وڭىرىندەگى ەكونوميكالىق جانە ەكولوگيالىق قاۋىپسىزدىكتى قامتاماسىز ەتۋدىڭ وزەكتى ماسەلەلەرى تالقىلاندى، دەپ حابارلايدى Almaty-akshamy.kz Egemen.kz سىلتەمە جاساپ.
قازاقستان وكىلى، پارلامەنتتىك اسسامبلەيا ءتوراعاسىنىڭ ورىنباسارى جانە اسسامبلەيانىڭ ورنىقتى دامۋ سالاسىنداعى ماقساتتار جونىندەگى ارناۋلى وكىلى بولىپ تابىلاتىن سەناتور ءوز سوزىندە ارال تەڭىزىنىڭ پروبلەماسىنا ەۋروپالىق پارلامەنتشىلەردىڭ نازارىن اۋداردى. بۇل تەك 60 ميلليوننان استام حالقى بار ارال ايماعىنداعى مەملەكەتتەر ءۇشىن عانا ەمەس، بۇكىل الەم قوعامداستىعى ءۇشىن دە سىن-قاتەرگە اينالدى.
ارال تەڭىزىنىڭ قۇرعاۋى بۇۇ-نىڭ ادام ارەكەتىنەن تۋىنداعان ەڭ اۋىر ەكولوگيالىق اپات رەتىندە تانىلعانى بارشاعا بەلگىلى جانە ونى شەشۋ ءۇشىن بۇكىل الەم قوعامداستىعىنىڭ كۇش-جىگەرىن بىرىكتىرۋ قاجەت.
وسى ماسەلەنى شەشۋ ماقساتىندا ەقىۇ-نىڭ ىقتيمال ۇلەسىن تالقىلاۋ ءۇشىن كوميتەت دەپۋتاتتارىنا، سونداي-اق ەقىۇ-نىڭ مۇددەلى پارلامەنتشىلەرىنە احۋالمەن ەگجەي-تەگجەيلى تانىسۋعا ارال وڭىرىنە بارۋ ۇسىنىلدى.
بۇل باستامانى قازاقستاننىڭ كليماتتىڭ وزگەرۋىنە قارسى جۇزەگە اسىپ جاتقان كۇرەس اياسىندا قاراستىرعان ءجون. اعىمداعى جىلدىڭ شىلدە ايىندا بيرمينگەمدە وتكەن ەقىۇ پا-نىڭ جىل سايىنعى سەسسياسىندا قازاقستان مەن وزبەكستاننىڭ پارلامەنتتىك دەلەگاسيالارى ارال تەڭىزىن قۇتقارۋعا بايلانىستى جوبالاردى ۇيلەستىرۋگە قاتىسۋعا دونور ەلدەردى شاقىرعان بولاتىن.
كوميتەت بيۋروسى وسى ماسەلە بويىنشا 2023 جىلدىڭ ءبىرىنشى جارتىسىندا ەقىۇ پارلامەنتتىك اسسامبلەياسىنىڭ دەلەگاسياسىن ارال وڭىرىنە جىبەرۋ تۋرالى ۇسىنىسقا قولداۋ ءبىلدىردى.