21 قازاننان باستاپ تۇرعىلىقتى جەرى بويىنشا تىركەۋى جوق ازاماتتارعا SMS-حابارلاما جىبەرىلەدى.
ءىىم 21 قازاننان باستاپ تۇرعىلىقتى جەرى بويىنشا تىركەۋى جوق ازاماتتارعا SMS-حابارلامالاردى جىبەرۋدى باستادى، دەپ حابارلايدى Almaty-akshamy.kz
«Eگەر وسىنداي SMS-حابارلاما كەلىپ تۇسكەن بولسا، وندا ءىىم دەرەكقورىندا ءسىزدىڭ تىركەلۋىڭىز تۋرالى مالىمەت جوق. سوندىقتان سىزگە تۇرعىلىقتى جەرىڭىز بويىنشا تىركەلۋ قاجەت. مۇنداي حابارلامالاردى جىبەرۋدىڭ ماقساتى ناقتى تۇراتىن جەرى بويىنشا تىركەۋسىز تۇرۋعا بايلانىستى اكىمشىلىك قۇقىقبۇزۋشىلىقتاردىڭ الدىن الۋ، سونداي-اق الەۋمەتتىك-ەكونوميكالىق تۇرعىدان وسال ازاماتتارعا قوسىمشا قارجىلىق جۇكتەمەنى ازايتۋ (اكىمشىلىك جاۋاپكەرشىلىككە تارتۋدى بولدىرماۋ ءۇشىن)»، - دەلىنگەن حابارلامادا.
بۇگىندە تۇرعىلىقتى جەرى بويىنشا تىركەۋسىز تۇرعانى ءۇشىن 10 كۇننەن 1 ايعا دەيىن ەسكەرتۋ تۇرىندە اكىمشىلىك جاۋاپكەرشىلىك، 1 ايدان اسا ۋاقىتقا 7 ايلىق ەسەپتىك كورسەتكىش نەمەسە 21 441 تەڭگە مولشەرىندە ايىپپۇل قاراستىرىلعان («اكىمشىلىك قۇقىق بۇزۋشىلىق تۋرالى» قازاقستان رەسپۋبليكاسى كودەكسىنىڭ 492-بابى).
قازىرگى ۋاقىتتا تۇرعىلىقتى جەرى بويىنشا تىركەۋ قىزمەتى «ەلەكتروندىق ۇكىمەت» پورتالىندا قولجەتىمدى. ءوزىڭىزدىڭ تۇرعىلىقتى جەرىڭىز بويىنشا تىركەلۋىڭىزدى پورتالداعى «جەكە كابينەتتە» (eGov.kz) نەمەسە eGov mobile ءموبيلدى قوسىمشاسىندا تەكسەرە الاسىز.