بۇگىن ءانشى، كومپوزيتور، مۋلتيينسترۋمەنتاليست، قازاقستاننىڭ حالىق ءارتىسى ديماش قۇدايبەرگەن 30 جاسقا تولدى.
تالانتتى ءانشى ءتۇرلى حالىقارالىق بايقاۋلاردا ۇزدىك اتاندى. 2013 جىلى «مەيكين ازيا» ءى حالىقارالىق فەستيۆالىنىڭ جەڭىمپازى بولدى. ۆيتەبسك قالاسىندا وتكەن XXIV حالىقارالىق «سلاۆيان بازارى-2015» ەسترادالىق ءان ورىنداۋشىلار بايقاۋىندا گران-پري جەڭىپ الدى.
2015 جىلى ىستانبۇلدا ديماش قۇدايبەرگەن «Abu TV» حالىقارالىق ازيا-تىنىق مۇحيت فەستيۆالىندە قازاقستان اتىنان العاش رەت قاتىستى. ال 2017 جىلى قىتايدا وتكەن «I’am singer» جوباسىندا ءانشى ءدۇيىم جۇرتتى ءتانتى ەتتى.
ديماش قۇدايبەرگەن 5 جاسىنان باستاپ فورتەپيانودا ويناۋدى ۇيرەنگەن. ول سەرب، يتاليان، فرانسۋز، اعىلشىن، ورىس ت.ب تىلدەردە ءان ورىندايدى.
ديماشتىڭ تاڭ قالدىرارلىق ەرەكشە داۋىسى بار.
ول ءبىر كونسەرتتە فورتەپيانونىڭ كلاۆيشتەرى جوق، 7 وكتاۆاعا بولاتىن فا نوتاسىن الىپ، كۇللى الەمدى اۋزىنا قاراتتى. ماماندار داۋىستى مۇنداي دەڭگەيگە كوتەرۋ وتە قيىن ەكەنىن بىر-بىرىمەن جارىسا جازىپ، تاڭدانىسىن جاسىرمادى.
گيننەس رەكوردتار كىتابىندا ەڭ ۇزاق ورىندالعان نوتا 20،2 سەكۋندقا جەتەتىن بولسا، ديماش ءجاسوسپىرىم كەزىندە-اق ءبىر نوتانى 23 سەكۋندقا دەيىن سوزىپ ورىنداي العان.
ديماش 2021 جىلى THE 100 MOST ATTRACTIVE ASIAN CELEBS رەيتينگىندە توپ جارىپ، ازيانىڭ ەڭ سىمباتتى جىگىتى اتاندى.
بۇگىندە ونەرپازدىڭ ميلليونداعان جانكۇيەرى بار.
ديماشتىڭ 30 جاسقا تولۋىنا وراي، الەمنىڭ تۇكپىر-تۇكپىرىندەگى جانكۇيەرلەرى قازاق تىلىندە ءان شىرقادى. «Mahabbat Ber Magan» كومپوزيسياسىن قازاق تىلىندە 21 ەلدەن كەلگەن 98 جانكۇيەر ورىنداعان.
ديماش قۇدايبەرگەن ءوزىنىڭ تاۋداي تالابى، ءبىرتۋار تالانتىمەن ەلىمىزدىڭ اتىن اسقاقتاتىپ، الەمگە تانىتىپ كەلەدى.