اتالعان سايت قىزمەتىنە جۇگىنگەن 4 مىڭعا جۋىق ادام جۇمىسقا ورنالاسقان
ماماندار بۇرىنعىداي ۇزىن-سونار كەزەككە تۇرىپ، التىنداي ۋاقىتىن سارپ ەتەتىن زاماننىڭ ارتتا قالعانىن ايتادى. سەبەبى ەلەكتروندى پورتال ارقىلى وڭاي تىركەلىپ، قالاعان سۇراعىڭا جاۋاپ الۋعا بولادى، دەپ حابارلايدى Almaty-akshamy.kz Almaty.tv-عا سىلتەمە جاساپ.
Enbek.kz پورتالى ارقىلى جۇمىسقا ورنالاسقانداردىڭ ءبىرى – ادىلەت جاڭابايەۆ. ول بۇعان دەيىن ءار مەكەمەنىڭ ەسىگىن توزدىرىپ، جۇمىس تاپپاي ۇزاق ءجۇرىپ قالىپتى. كەيىن ارنايى ورتالىقتىڭ ەلەكتروندى سايتىنا تۇيىندەمەسىن جۇكتەپ، از ۋاقىت ىشىندە ءتۇرلى ۇسىنىستار تۇسكەنىن ايتادى.
«مۇندا قانشاما كەزەكتە تۇردىم، قانشاما ۋاقىتىم كەتتى. سودان كەيىن جۇمىسپەن قامتۋ ورتالىعىنىڭ ماماندارى ەnbek.kz سايتى تۋرالى ايتىپ ءتۇسىندىردى. سول سايت ارقىلى جۇمىس تاپقانىما 6 ايداي ۋاقىت بولدى. ءقازىر وسىندا جۇمىس ىستەپ جاتىرمىن»، – دەدى قالا تۇرعىنى نۇرداۋلەت بەكەتايەۆ.
جۇمىسپەن قامتۋ ورتالىعىنا بۇرىن كۇنىنە 300-دەي ادام كەلەتىن بولسا، ءقازىر 50 شاقتى ازامات جۇگىنەدى. ياعني، ونلاين قىزمەت كورسەتۋ ساپاسى ارتقان. Enbek.kz سايتىنىڭ ەرەكشەلىگى – ۇيدە وتىرىپ-اق ەلەكتروندى تۇردە تىركەلە الادى.
«ونلاين تيىمدىلىگى، بىرىنشىدەن، جۇگىنگەن ازاماتتاردىڭ ۋاقىت جانە قارجى شاعىمدارىن قىسقارتادى. ودان بولەك، ۇيدەن شىقپاي-اق بىزدەن كورسەتىلەتىن قىزمەتتەردى الۋعا بولادى»، – دەدى حالىقتى جۇمىسپەن قامتۋ ورتالىعىنىڭ مامانى ادىلەت جاڭابايەۆ.
سونداي-اق جۇمىس بەرۋشى زاڭدى تۇلعالار دا ونلاين قىزمەتكە جۇگىنىپ، ءار ازاماتتىڭ تۇيىندەمەسىن تەكسەرە الادى.
ايتا كەتەيىك، جىل باسىنان بەرى Enbek.kz سايتىنا 15 مىڭنان استام قالا تۇرعىنى جۇمىس ىزدەۋشى رەتىندە، 15 مىڭ 74 ادام جۇمىسسىز ەسەبىندە تىركەلگەن.