SMS 1414 نومىرىنەن كەلەدى.
حابارلاما 13 اقپاننان باستاپ جولدانادى، دەپ حابارلايدى Almaty-akshamy.kz
ەڭبەك جانە حالىقتى الەۋمەتتىك قورعاۋ مينيسترلىگى 23 جاستان 35 جاسقا دەيىنگى جۇمىسسىز جۇرگەن 12 مىڭ جاس ازاماتقا SMS جولدايدى. مينيسترلىكتىڭ حالىقتى جۇمىسپەن قامتۋ دەپارتامەنتىنىڭ ديرەكتورى اسقار نيازوۆ حابارلاما نە ءۇشىن جىبەرىلەتىنىن ءتۇسىندىردى.
"بۇرىن ءبىز جۇمىسسىز جۇرگەن ازاماتتاردىڭ وزدەرى ءوتىنىش جىبەرگەنىن كۇتىپ وتىراتىن ەدىك. ەندى ءبىز ولاردىڭ تەلەفونىنا ءوزىمىز سمس جىبەرەمىز. حابارلامادا ەڭبەك مينيسترلىگى الگى ازاماتقا جۇمىس ىزدەۋ مۇمكىندىگىن پايدالانۋدى، تەگىن وقۋدان ءوتۋدى نەمەسە جۇمىسىنان ايىرىلۋ بويىنشا الەۋمەتتىك تولەم الۋدى ۇسىنادى. قوسىمشا اقپارات قاجەت بولسا، حابارلامادا تۇرعان سىلتەمەنى باسۋعا بولادى. سىلتەمەگە وتكەن ادام قانداي بوس جۇمىس ورىندارى بار، بىلىكتىلىكتى ارتتىرۋ كۋرستارىنا قالاي بارۋعا بولادى دەگەن سياقتى سۇراقتارعا جاۋاپ الادى. نەمەسە 1414 نومىرىنە قوڭىراۋ شالۋعا بولادى"، - دەپ ءتۇسىندىردى نيازوۆ.
ايتۋىنشا، مينيسترلىك جۇمىسسىز جاستاردى 8 الەۋمەتتىك توپ بويىنشا ىرىكتەپ العان. ءار جاس توبى بويىنشا 1 000 SMS-حابارلاما جىبەرۋ جوسپارلانىپ وتىر.
"بۇل - ءبىزدىڭ العاشقى پيلوتتىق جوبامىز. سول سەبەپتى 12 مىڭ حابارلامامەن شەكتەلىپ قالمايمىز. بۇدان كەيىنگى كەزەڭدەردە ءبىز SMS سانىن ۇلعايتامىز"، - دەدى دەپارتامەنت ديرەكتورى.
نيازوۆتىڭ ايتۋىنشا، ءقازىر رەسپۋبليكا بويىنشا جاستار اراسىنداعى جۇمىسسىزدىق كورسەتكىشى – 3،8 پايىز نەمەسە 80 مىڭ ادام. ولاردىڭ كوبى تۇركىستان، جامبىل وبلىستارى مەن الماتى قالاسىنان.
SMS-حابارلاما جىبەرۋ ارقىلى مينيسترلىك حالىقپەن كەرى بايلانىس ورناتۋدى كوزدەپ وتىر. ويتكەنى جۇمىسسىزدار اراسىندا ءوزىن-وزى جۇمىسپەن قامتىپ وتىرعان، ءبىراق زەينەتاقى جارناسىن، الەۋمەتتىك اۋدارىمداردى تولەمەيتىن ازاماتتار بولۋى مۇمكىن. ياعني حابارلاما جولداۋ ارقىلى وسى ساناتتاعى ازاماتتاردىڭ قازىرگى ستاتۋسى دا انىقتالادى.