الماتىدا موپەد ۇرلاۋشىلار ۇستالدى

الماتى پوليسەيلەرى جاڭا شاعىناۋداننان موپەد ۇرلاپ جۇرگەندەردى قۇرىقتادى.

الماتى قالاسى ناۋرىزباي اۋدانىنىڭ پوليسيا قىزمەتكەرلەرى جاڭا اۋداندارىنىڭ بىرىنەن ەكى موپەد ۇرىسىن ۇستادى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

«قازىرگى ۋاقىتتا «دۋەتتىڭ» ءۇش موپەد ۇرلىعىنا قاتىستىلىعى انىقتالدى. 32 جاستاعى ا. ەسىمدى ازامات پەن 24 جاستاعى ت. ەسىمدى ازامات زاڭسىز بايۋ ماقساتىندا، تۇندە كوپ قاباتتى ۇيلەردىڭ اۋلالارىندا قاراۋسىز قالعان كولىك قۇرالدارىن «انىقتاپ جۇرگەن». ودان سوڭ ۇرلاپ، كەيىن جاسىرىپ قويعان. كەيىن ولار كولىك قۇرالدارىن قايتا ساتۋدى جوسپارلاعان، ءبىراق ۇلگەرمەگەن. ءۇش موپەد تاركىلەندى جانە ايعاقتى زات رەتىندە قىلمىستىق ءىس ماتەريالدارىنا تىركەلدى. جامبىل جانە تۇركىستان وبلىستارىنان كەلگەندەردىڭ بۇرىن قىلمىستىق جاۋاپكەرشىلىككە تارتىلماعاندىعى بەلگىلى بولدى. بۇل ەپيزودتار ق ر قك-نىڭ 188-بابى (ۇرلىق) بويىنشا ءبىر ءىس جۇرگىزۋگە بىرىكتىرىلدى. قازىرگى ۋاقىتتا تەرگەۋشىلەر كۇدىكتىلەردىڭ قالانىڭ باسقا اۋداندارىندا بۇرىن جاسالعان وسىعان ۇقساس قىلمىستارعا قاتىسى بار-جوعىن تەكسەرىپ جاتىر»، – دەدى ناۋرىزباي اۋداندىق پوليسيا باسقارماسىنىڭ باستىعى مۇحامەدالى سەيسەن ۇلى.